Mga bagong baril, ipinamahagi ni Pangulong Aquino sa pulisya

MALAPIT nang magkatotoo ang target na isang baril sa bawat isang pulis sa kanyang pamamahagi ng 9 mm Glock 17 pistols sa mga kagawad ng Philippine National Police sa turn-over ceremonies na ginawa kanina sa Kampo Crame, sinabi ni Pangulong Benigno Simeon C. Aquino III na hindi magtatagal ay matatapos ang pamamahagi ng may 74,879 na pistola sa mga pulis.

Gumastos ang pamahalaan ng P 1.198 bilyon at sa tamang proseso ng bidding, nakatipid pa ng higit sa P 200 milyon. Sa kanyang talumpati, nakabili sila ng 15,000 piraso ng mga 9mm pistols na pawang de kalidad at mas makakatipid sa pagbili ng piyesa.

Napababa na rin umano ng pamahalaan ang crime volume mula sa 319,441 noong 2010, umabot na ito sa 217,812 noong 2012. Bumaba na rin ang carnapping incidents ng may 40% samantalang bumaba na rin ang kidnap-for-ransom ng may 73%. Sinagupa na rin umano ng pulisya ang Private Armed Groups kaya't nabawasan ang kanilang mga illegal na gawain.

Tapos na rin ang panahon ng pang-aapi sa mga pulis sa iba't ibang larangan. Madarama na ng mga pulis ang pag-aaruga at pagmamahal ng sambayanan sa pamamagitan ng mga programang mag-aangat sa kanilang katayuan.