PINANGUNAHAN ni Pangulong Benigno Simeon C. Aquino III ang pagsalubong sa ikalawang Hamilton-class cutter sa Subic Bay sa Zambales. Sa kanyang talumpati, nanawagan si G. Aquino sa mga tauhan ng Sandatahang Lakas ng Pilipinas at handang magpakita ng katapangan at pananagutan na inaasahan sa mga kawal ng bansa.
Pinuri niya ang mga tauhan ng barko sa pamumuno ni Captain Ernesto Baldivino sa matagumpay na paglalakbay mula sa Estados Unidos patungo sa Subic Bay Development Authority.
Ipina-alala niya na maraming bahagi ng kasaysayan sa mga dinaanan ng barko sa paglalakbay nito patungo sa Pilipinas kabilang na ang Pearl Harbor at Guam. SA Pearl Harbor naganap ang pagsalakay ng mga Japones noong Ikalawang Digmaang Pandaigdig at sa Guam naman ipinatapon si Apolinario Mabini na nakipaglaban para sa kasarinlan ng bansa. Nagpapahalaga lamang ang mga pook na ito sa kahalagahan ng Kasaysayan at ang pangangailangang tumupad sa mandato na maglingkod sa watawat, bantayan ang soberenya at pangalagaan ang kapakanan ng mga mamamayan.
Malaking tulong umano ang barko sa pagtatanod sa baybay-dagat ng Pilipinas. Ipinagmalaki ni Pangulong Aquino na sa tatlong taong panunungkulan ay umabot na sa 27.62 bilyon ang nagastos sa AFP modernization program.
1 2 3 
