Mga tauhan ng Philippine Coast Guard, pinapanagot sa pagpatay sa isang Taiwanes

LUMABAS na ang rekomendasyon ng National Bureau of Investigation hinggil sa kanilang pagsisiyasat sa naganap na pamamaril na ikinasawi ng isang mangingisdang Taiwanes sa Balintang Channel noong nakalipas na ika-siyam ng Mayo.

Sa isang press conference, sinabi ni NBI Director Nonnatus Rojas na rekomendasyon nilang papanagutin ang mga tauhan ng Philippine Coast Guard sapagkat hindi nila naipaliwanag na mayroong peligrong dulot ang mga Taiwanes na mangingisda.

Ipinaliwanag pa niya na ayon sa mga kautusan ng Philippine Coast Guard, makagagamit lamang sila ng mga sandata o anumang makamamatay na kagamitan kung mayroong malubhang panganib sa kanilang buhay. Magkakaroon din ng kasong obstruction of justice ang commanding officer, ang executive officer at dalawang iba pang tauhan ng Philippine Coast Guard sapagkat pinakialaman nila ang ebidensya sa imbestigasyon.

Ipararating ang usaping homicide laban saw along tauhan ng Philippine Coast Guard na kinilala sa mga pangalang Commanding Officer Arnold dela Cruz, SN1 Edrando Quiapo Aguila, SN1 Mhelvin Bendo, SN2 Nicky Reynold Aurello, SN1 Andy Gibb Ronario Golfo, SN1 Sunny Galang Masangcay, SN1 Henry Baco Solomon at PO2 Richard Fernandez Corpuz.

Kasabay ng NBI, nagsagawa rin ng imbestigasyon ang mga Taiwanes at humiling sa Pilipinas na humingi ng tawad sa pagkasawi ni Hung Shih-Cheng. Matapos ang ilang araw mula noong ika-siyam ng Mayo, hinirang ni Pangulong Aquino si Amadeo Perez, Jr. Chairman na Manila Economic and Cultural Office bilang kinatawan at magpaabot ng pakikiramay sa naulila ng nasawi.

Noong nakalipas na Hulyo, nabatid na mayroong mga 10,000 OFWs sa Taiwan ang pinauwi sa Pilipinas matapos tapusin ang kanilang mga kontrata sa kalagitnaan ng isinasagawang imbestigasyon.