Survey ng Simbahan, sinimulan na
MARTES ng ilabas ng General Secretariat ng Catholic Bishops Conference of the Philippines ang sirkular sa 80 ecclesial provinces o dioceses upang masimulan ang konsultasyon na hiniling ni Pope Francis.
Ayon kay Msgr. Joselito C. Asis, secretary general ng kapulungan, bagama't may petsa ang liham na ika-18 ng Oktubre sa Vatican City, natanggap nila sa Maynila ang liham noong nakalipas na Lunes, ika-apat ng Nobyembre. Ipinadala ang liham kay Lingayen-Dagupan Archbishop Socrates B. Villegas, ang papasok na pangulo ng Catholic Bishops Conference of the Philippines
Nilalaman ng liham ang preparatory document para sa ikatlong Extraordinary General Assembly ng Synod of Bishops na may temang "Pastoral Challenges to the Family in the Context of Evangelization na gagawin sa ikalima hanggang ika-19 ng Oktubre 2014.
Idinagdag ni Msgr. Asis na ang liham ni Arsobispo Lorenzo Baldesseri, General Secretary ng Synod of Bishops ay naglalaman ng kahilingang ipamahagi ang dokumento sa pinakamaraming mamamayan upang marinig ang kanilang mga pananaw sa nilalamang questionnaire bilang paghahanda sa working draft ng sinodo.
Kailangang maisumite sa Vatican City ang nalagom na tugon bago sumapit ang ika-31 ng Enero, 2014.
Ayon kay Msgr. Asis, ang konsultasyon tungkol sa pamilya ay nangungunang prayoridad ng CBCP sa limang paksang kanilang ipinadala sa Vatican kamakailan. Malaki ang posibilidad na mga isyung may kinalaman sa pamilya ang naging praroyidad rin ng iba't ibang bansa. Ang mga obispo ay inaasahang magpapadala ng sipi ng questionnaire sa mga parokya at pag-uusapan ng mga kabilang sa Simbahan.
Ang mga katanungan ay may kinalaman sa mga turo ng simbahan, kasal ayon sa Natural Law, ang pangangalaga sa bawat pamilya ayon sa ebanghelisasyon, pag-aalaga sa mga mag-asawang nasa mahirap na kalagayan, sa pagsasama ng mga taong iisa ang aksarian at pag-aaral ng mga anak na mula sa tinaguriang irregular marriages, ang kahandaan ng mga mag-asawa sa pagkakaroon ng supling, relasyon ng pamilya at ng tao at iba pang mga hamon at mga panukala.
Idinagdag pa ni Msgr. Asis na ang bawat paksa ay mayroong apat hanggang walong katanungan.
1 2
