Batid na kung saang dibisyon matutungo ang mga usapin laban sa tatlong senador
NATAPOS na ang raffle sa Sandiganbayan kung saang dibisyon matutungo ang usaping plunder na inihain ng pamahalaan laban kina Senador Juan Ponce-Enrile, Jose "Jinggoy" Estrada at Ramon "Bong" Revilla, Jr.
Ang Third Division ay binubuo nina Presiding Justice Amparo Cabotaje Tang at Associate Justices Samuel Martires at Alex Quiroz bilang mga miyembro ang dirinig ng reklamo laban kay Senador Juan Ponce-Enrile.
Ang usapin laban kay Senador Jinggoy Estrada ay matutungo sa 5th Division na pinamumunuan ni Associate Justice Roland Jurado at kasamang si Associate Justices Alexander Gesmundo. May isang bakanteng luklukan sa 5th Division.
Mahaharap naman si Senador Ramon "Bong" Revilla Jr. sa 1st Division sa ilalim ni Associate Justice Efren dela Cruz at Associate Justices Rodolfo Ponferrada at Rafael Lagos bilang mga kasapi.
Pinag-isa na ang 45 plunder at graft charges laban sa kanila at mga kasamang akusado. Si Janet Lim-Napoles ay kabilang sa mga akusado sa kasong plunder. Kasama rin sa mga akusado ang mga pinagtitwalaang tauhan ng mga senador, mga opisyal ng mga ahensyang nagpatupad ng mga proyektong mula sa pork barrel at mga kasapi ng mga palsipikadong non-government organizations.
Ayon kay Associate Justice Oscar Herrera, chairman ng Raffle Committee, pinagsama-sama na nila ang mga usapin laban sa mga akusado.
Idinagdag pa ni Justice Herrera na apat na dibisyon lamang ang lumahok sa raffle sapagkat si Associate Justice Gregory Ong na namumuno sa 4th Division ay nagsabing hindi siya lalahok sa pork barrel scam case.
Isinangkot si Ong sa sinasabing pork barrel scam mastermind Janet Lim-Napoles. Ayon kay whistleblower Marina Sula si Ong ay madalas dumalaw kay Napoles sa kanyang tanggapan sa Discovery Suites sa Ortigas Center, Pasig.
Matapos ang raffle kanina, ang mga record ng mga usapin ay ipadadala sa mga dibisyong dirinig ng reklamo. Bibigyan ang mga mahistrado ng sampung araw na alamin kung mas sapat na usapin upang maglabas ng warrant of arrest. Ang paglalabas ng arrest warrants ay maaaring humigit sa sampung araw ayon sa tagal ng pag-aaral ng mga mahistrado ng mga usapin.
Kinasuhan ng plunder ang tatlong senador kasama si Janet Lim Napoles sa paglahok sa paglustay ng Priority Development Assistance Fund na mula sa mga mambabatas.
May 16 na kaso laban kay Enrile, 12 laban kay Estrada at 17 laban kay Revilla. Nakarating umano ang mga pondo sa mga palsipikadong NGOs na itinatag ni Napoles. Kinasuhan din ng graft sa Sandiganbayan ang mga senador at si Napoles.
Ani 3rd Division Presiding Justice Tang, pinagsama-sama na ang mga usapin sapagkat mayroong koneksyon. Tumangging sumagot si Justice Tang sa kahilingan ng Ombudsman na magtatag ng isang special division para sa pork barrel scam cases sapagkat makabubuting maghintay na lamang ang madla ng kanilang tugon na isusumite nila sa Korte Suprema sa mga susunod na araw.
1 2 3 4 5 6 7 8
