|
||||||||
|
||
melo/20141103.m4a
|
MGA NASALANTA NI YOLANDA, UNTI UNTING NAKAKABAWI. Ito ang pahayag ng mga panauhin sa idinaos na Tapatan sa Aristocrat. Makikita sa larawan si Atty. Karen Jimeno, Communications Director ng Office of the Presidential Assistant on Rehabilitation and Recovery na nagpapaliwanag na malaki ang magagawa ng nakalaang P 167 bilyon. Kasama rin sa panel sina Joseph Curry ng Catholic Relief Services (pangatlo mula sa kanan), Eric Salve ng Philippine Red Cross (pangalawa mula sa kanan) at Dr. Edgar Posadas (bahagyang natatakpan, pangalawa mula sa kaliwa) executive director ng Pharmaceutical and Healthcare Association of the Philippines. (Areopagus Social Media for Asia Photo)
MATAPOS ang halos isang taon sa paghagupit ni "Yolanda" sa Central Philippines, unti-unting nakakabawi ang mga biktima ng pinakamalakas na bagyong tumama sa lupa sa kasaysayan ng daigdig.
Ayon kay Eric Salve, ang Senior Manager para sa Disaster Management ng Philippine Red Cross, tuloy pa rin ang kanilang pagtulong sa mga nasalanta ng bagyo sa pamamagitan ng pondong mula sa iba't ibang Red Cross at Red Crescent societies sa buong daigdig. Ito ang dahilan kaya't umabot sa 390,399 pamilya ang nabigyan ng emergency food items samantalang may 230,003 pamilya ang nabigyan ng kumot, 225,522 pamilya ang nabigyan ng kulambo at iba pang pangangailangan ng mga nasalanta.
Sa panig ni G. Joseph Curry, ang country representative ng Catholic Relief Services, tuloy ang kanilang pabahay sa Leyte, Samar at iba pang sinalanta ni "Yolanda." Nakikipagtulungan sila sa mga simbahan sa pamamagitan ng mga diyosesis at mga parokya kasama ang mga nasalanta ng bagyo upang pag-usapan ang mga itatayong tahanan. Tiniyak din niyang ang lahat na ginagamit sa pabahay ay gawa sa Pilipinas liban nga lamang sa yero na inaangkat pa. Hanggang sa araw na ito, nakapaglabas na ang Catholic Relief Services ng may P 1 bilyon para sa mga nasalanta.
Niliwanag naman ni Atty. Karen Jimeno (Communications Director ng Office of the Presidential Assistant on Rehabilitation and Recovery) na nilagdaan na ni Pangulong Aquino ang master plan para sa rehabilitation ng mga nasalantang pook mga apat na araw na ang nakalilipas. Nagkakahalaga ito ng P 167 bilyon at maglalabas ng (pa ng dagdag ) pondo sa susunod na dalawang taon.
Naisumite na nila ang panukalang master plan noong unang araw ng Agosto. Posible umanong natagalan ang approval sapagkat ang master plan ay mayroong 8,000 pahina. Maaari umanong nagtagal ang ehekutibo sa pagbabalik-aral sa mga dokumento.
Bagaman, ang Office of the Presidential Assistant on Rehabilitation and Recovery ay hanggang ika-30 ng Hunyo 2016 ang buhay sapagkat co-terminus ito sa panunungkulan ni Pangulong Benigno Simeon C. Aquino III.
Idinagdag ni Atty. Jimeno na hamak na mas mabilis na makabawi ang mga nasalanta kung ihahambing sa ibang mga bansang nilindol, binagyo at binaha tulad ng naganap sa Banda, Aceh sa Indonesia na umabot ng may walong taon.
Isang daang milyong piso na rin ang nai-ambag ng Pharmaceutical and Healthcare Association of the Philippines sa pamamagitan ng mga gamot at kailangan na rin ang ibayong pagsusuri kung paano matutugunan ang mga health concerns ng mga nalalabing tao sa loob ng bunk houses at transitional homes.
Kailangang magkaroon ng mga reporma upang higit na matulungan ang mga biktima ng mga kalamidad. Ito ang idinagdag ni Atty. Jimeno sapagkat mahirap unawain na bubuwisan pa ng pamahalaan ang mga pumapasok na ayuda mula sa ibang bansa samantalang ang makikinabang naman ay pawang mga nasalanta ng bagyo at iba pang kalamidad.
© China Radio International.CRI. All Rights Reserved. 16A Shijingshan Road, Beijing, China. 100040 |