PINAG-UUSAPAN sa iba't ibang himpilan ng radyo at maging sa social media ang balitang itinago ng pamahalaan ang may 500 street children kasama ang kanilang mga pamilya sa isang bakasyunan sa Nasugbu, Batangas sa limang araw na pananatili ni Pope Francis sa bansa.
Ayon sa isang ulat sa telebisyon, 10 bus na puno ng mga naninirahan sa kalye ang dumating sa Chateau Royale Resort sa Nasugbu, Batangas noong umaga ng Miyerkoles, ika-14 ng Enero.
May 70 silid ang kinuha ng Department of Social Welfare and Development para sa mga mahihirap sa Pasay, Maynila at Paranaque para sa sinabing "family camp."
Ayon sa balita sa media, ang bawat silid ay nagkakahalaga ng P 6,300 bawat gabi subalit nakuha ng DSWD ang mga silid sa halagang P 4,000 bawat isa. May 100 mga tauhan ng DSWD ang nanirahan din sa resort upang daluhan ang pangangailangan ng mga mahihirap at pangasiwaan ang kanilang mga gagawin.
Umalis ang mga nanirahan sa resort noong Lunes, ika-19 ng Enero, ang huling araw ni Pope Francis sa Pilipinas.
Sa isang panayam sa Time Magazine, inamin ni Secretary Corazon Soliman na inilayo ang mga walang tahanang mga pamilya upang hindi sila mahirapan sa pagdagsa ng mga taong dadalo at sasaksi sa mga programang katatampukan ng Santo Papa.
Ipinaliwanag niya na ang family camp sa Nasugbu ay bahagi ng Modified Conditional Cash Transfer program. Idinagdag pa niya na ang mga pamilya ay hindi makapagdudulot ng positibong impluensya sa mga mamamayan.
Sa panayam sa isang himpilan ng radyo, binanggit ni Gng. Soliman na hindi nila itinago ang mahihirap sa Santo Papa.
Sa panig ni Arsobispo Oscar V. Cruz, ang pangyayaring ito'y pinakasukdulan ng pagiging hipokrito ng pamahalaan sapagkat binayaran pa ang gastos ng salapi ng bayan. Ipinagtanong ng dating pangulo ng Catholic Bishops Conference of the Philippines kung magagawa ni Pangulong Aquino at Kalihim Soliman kung ang salaping ibabayad ay mula sa kanilang lukbutan.
Ani Arsobispo Cruz, hindi dumalaw si Pope Francis sa Pilipinas upang makadaupang palad ang mayayaman.
Sinabi naman ni Arsobispo Ramon Arguelles ng Lipa na pinagtangkaan ng pamahalaang itayo ang katotohanan. Ang nakahihiyang ginawang ito ay paglabag sa kautusan ng Diyos na nakikinig sa hinaing ng mahihirap.
Hindi bingi ang Santo Papa at dumalaw siya sa Pilipinas para sa mahihirap. Batid ni Pope Francis kung sino ang mahihirap at kung nasaan sila. Ngayon malalantad ang pagka-hipokrito ng mga namumuno sa bansa.
Dalangin din ni Arsobispo Arguelles na ang ginawang ito ng pamahalaan at naganap ng walang pagsang-ayon ng mga namumuno sa Simbahan.
1 2 3 4 5 
