Aral sa abroad

Kasabay ng pag-unlad ng ekonomiya ng Tsina, umunlad din ang kalidad ng edukasyon sa bansa. Kaya naman, tumaas din ang appeal ng Tsina sa mga mag-aaral mula sa ibang bansa.

Ayon sa pinakahuling datos mula sa Ministri ng Edukasyon, ang Tsina ngayon ang siya nang ika-3 pinakapopular na "study destination" para sa mga expat na estudyante. Naungusan na po ng Tsina ang Pransya sa arenang ito. Ang pangtalawa ay United Kingdom, samantalang nasa unang puwesto ang Amerika.

Ayon pa sa website ng nasabing ministri, mayroong 377,054 na estudyanteng mula sa 203 bansa at rehiyon ang nag-aral sa Mainland Tsina noong 2014. Ito ay ay mas mataas ng 5.77% (20,555) kaysa sa taong 2013. Karamihan sa mga ito ay mula sa Asya.

Pero, ang tanong: sa anong bansa karaniwang nagmumula ang mga estudyante? Ano ang mga kursong pinag-aaralan ng mga dayuhan sa Tsina? Ano ang mga problemang kinakaharap ng mga unibersidad ng Tsina upang ang mga ito ay magkaroon ng higit na international appeal?

Ayon pa rin sa Ministri ng Edukasyon ng Tsina, ang pangatlo sa listahan ng pinakamaraming nag-aaral sa bansa ay mula sa Thailand, pangalawa ay mula sa Amerika, at ang nasa unang puwesto ay Timog Korea.

Sa kabilang dako, ang mga kursong pinag-aaralan ng mga expat sa Tsina ay: wika para sa mga mula sa maunlad na bansa; at mga degree program naman na tulad ng medisina, engineering, etc. para sa mga mula sa umuunlad na bansa.

Pero, mga kaibigan, kahit marami nang expat ang nag-aaral sa Tsina, marami pa rin ang mga problemang kinakaharap ng mga unibersidad dito upang totohanang masabing internasyonal na sila. Una sa mga problemang ito ay wlang website sa wikang Ingles ang karamihan sa mga unibersidad sa Tsina: pangalawa, walang application form sa wikang Ingles: ikatlo, walang kurso sa Ingles: ikaapat, problema sa pagta-transfer ng subject credir kung ang mag-aaral ay mula sa unibersidad sa labas ng Tsina.

Ibig sabihin mga kaibigan, para makapag-aral ang isang dayuhan sa Tsina, kailangang bihasa siya sa Mandarin at may karunungan siya sa kulturang Tsino.

Pero, sa kabila ng mga ito, alam po ba ninyo na may mga unibersidad na ngayon ang nag-o-offer ng kurso sa wikang Ingles? Isa po diyan ang Beijing Foreign Studies University.

Si Andile Munyai ay tubong South Africa. Siya ay dating DJ at ngayon ay isa nang estudyante, na kumukuha ng kursong Business and Marketing sa Beijing Foreign Studies University. Pakinggan po natin ang kanyang kuwento.