Cardinal Tagle, itatalagang pangulo ng Catholic Biblical Federation
CARDINAL TAGLE, ITATALAGANG PANGULO NG CATHILIC BIBLICAL FEDERATION. Aalis ngayong gabi patungong Roma si Bishop Renato P. Mayugba ng Laoag, Ilocos Norte upang dumalo sa CBF assembly na nagaganap sa bawat ika-anim na taon. Nahirang si manila Archbishop Luis Antonio G. Cardinal Tagle na pamunuan ang pederasyon. (Melo M. Acuna)
MAGKAKAROON ng dagdag na gawain si Manila Archbishop Luis Antonio G. Cardinal Tagle mula sa darating na Huwebes sa kanyang panunugkulan bilang pangulo ng Catholic Biblical Federation.
Ayon kay Laoag Bishop Renato P. Mayugba, vice chairman ng CBCP Episocpal Commission on Biblical Apostolate, magsisimula ang pulong sa ika-18 at magtatapos sa ika-22 ng Hunyo sa Vatican City.
Nagpupulong ang CBF sa bawat ika-anim na taon. Makakasama sa pagpupulong ang mga kinatawan ng iba't ibang bansa sa buong daigdig nalayuning sundin ang payo ni Pope Benedict XVI na magkaroon ng pakikipagniig sa Diyos sa pamamagitan ng Biblia.
Mahalaga para sa Pilipinas ang pagtitipong ito sapagkat nagbago na ang anyo ng bansa sa larangan ng pananampalataya. Ipinaliwanag ni Bishop Mayugba na maraming mga Filipino ang nagmimisyon sa iba't ibang bansa. Noong dekada sisenta, tumatanggap pa ng mga misyonero ang Pilipinas.
Napapanahon na umanong ibigay ang biyayang natamo sa iba't ibang bansa. Mangunguna sa delegasyon ng Pilipinas si San Fernando de Pampanga Auxiliary Bishop Pablo Virgilio David at sasamahan ni Bishop Mayugba. Magkakaroon din ng lima hanggang pitong laykong lalahok sa pagtitipon.
Aalis ang delegasyon ng Pilipinas ngayong gabi.
1 2 3 4 5 6 7
