NAG-USAP na sina Russian President Vladimir Putin at Pangulong Benigno Simeon C. Aquino III hinggil sa kanyang pagliban sa pagpupulong ng mga pinuno ng APEC economies sa darating na linggo.
Sa isang press briefing sa International Media Center, sinabi ni Foreign Affairs Assistant Secretary Charles Jose na hindi niya batid kung ano ang napag-usapan ng dalawang pangulo subalit maliwanag na ang pagdalo ni Russian Prime Minister Dmitry Medvedev sa pagtitipon.
Tumangging magbigay ng pahayag si Asst. Secretary Jose kung may kinalaman sa pagbabanta ng IS kay Russian President Putin kaya't minabuti nitong huwag nang dumalo sa pagtitipon.
Samantala, sinabi rin ni Asst. Secretary Jose na naghihintay pa sila ng pormal na pahayag sa hindi pagdalo ni Indonesian President Joko Widodo sa APEC. Magugunitang lumabas sa balitang nagdesisyon ang pangulo ng pinakamalaking bansa sa timog silangang Asia na daluhan muna ang domestic issues sa kanyang bansa matapos dumalo sa Group of 20 sa Istanbul at makapaghanda sa napipintong ASEAN meeting sa mga susunod na araw.
Idinagdag pa ng tagapagsalita ng Department of Foreign Affairs handa na ang lahat para sa pagtatapos ng maraming mga pagpupulong sa APEC 2015.
Walang anumang pag-uusapan hinggil sa mga 'di pagkakaunawaan sa karagatan sa kanlurang bahagi ng Pilipinas bagama't hindi mapipigilan ng Pilipinas kung mayroong bansang babanggit nito sa mga talumpati at pagpupulong.
Tumangging magbigay ng pahayag si G. Jose sa nabalitang pagdalaw ni Pangulong Barak Obama sa isang maritime facility samantalang nasa Pilipinas.
Wala na umanong nagpahayag pa ng hindi pagdalo sa APEC mula sa mga kasaping bansa.
1 2 3 4 5 
