Pangulong Duterte, lumisan na patungong Lima, Peru para sa APEC
UMALIS na kanina si Pangulong Rodrigo Duterte mag-aalas dos ng hapon at mga kasama patungong Lima, Peru para sa ika-24 na pagpupulong ng Economic Leaders ng Asia-Pacific Economic Cooperation. Makakasama niya ang mga pinuno ng 20 pang mga bansa na kabilang sa samahan.
Sa kanyang talumpati sa Davao International Airport, sinabi ni G. Duterte na isang magandang oportunidad na makasama ng Pilipinas ang mga kabalikat sa rehiyon upang madali ang pag-unlad ng ekonomya sa Asia-Pacific at mabatid ang mga paraan upang makamtan ang pinag-isang layunin.
Angkop umano ang temang "Quality Growth and Human Capital Development: A Foundation for Sustainable Growth in the Asia-Pacific."
Isusulong umano niya ang kanyang 10-point Socio-Economic Program tulad ng pagpapaluwag na mga proseso sa pagkakalakal sa pamamagitan ng maayos na pamamalakad ng pamahalaan, paggasta sa mga pagawaing-bayan, pagtutuon ng pansin sa kaunlaran sa kanayunan at dagdag na investments sa human capital.
Maliwanag ang kanyang mensahe sa APEC, bukas ang Pilipinas sa pakikipagkalakal at gagawin ang lahat upang magtagumpay ang small and medium enterprises. Ginagawa na ng pamahalaan ang lahat, dagdag pa niya.
Handa na umanong punailanlang ang Pilipinas sa daigdig ng kalakal. Idinagdag pa niyang ito ang kanyang kauna-unahang paglalakbay sa Timog America na halos may kahalintulad ng kasaysayan at daang-taong pakikipagkaibigan.
Umaasa rin siyang makapaghahanda ang mga mangangalakal na Filipino sa pakikipag-ugnayan sa mga nagmumula sa Timog America.
1 2 3 4 5
