Pamumugot sa isang mangingisda, kinondena ng Malacanang
KINONDENA ng Malacanang ang pamumugot na ginawa ng Abu Sayyaf sa isang mangingsida sa Patikul, Sulu. Ibinalita ng Armed Forces of the Philippines ang pamumugot kahapon, Pasko ng Pagkabuhay.
Sa isang pahayag, sinabi ni Presidential Spokesman Ernesto Abella na nakikiramay ang pamahalaan sa pamilya ng kapitan ng bangkang pangisdang Ramon 2 na si Noel Besconde na nasawi sa kamay ng mga kasapi ng Abu Sayyaf.
Idinagdag pa ni G. Abella na kinokondena nila ang pamumugot na ito. Inaalam pa ng pamahalaan ang kinalalagyan ng labi ng biktima sa pamamagitan ng walang-humpay na operasyon ng mga kawal.
Nanawagan din si G. Abella sa mga mamamayan na maging mapagbantay at makiisa sa mga kawal ng pamahalaan upang mapigil ang kriminalidad sa bansa. Nanawagan din siya sa mga mamamayan sa buong bansa na makiisa sa layunin ng pamahalaang gawing ligtas ang bansa para sa mga mamamayan nito. Dinukot si Besconde at ang tatlong mga tauhan sa Celebes Sea noong Disyembre ng nakalipas na taon.
1 2 3 4 5