TIANJIN—Ipinangako ng mga opisyal sa kapaligiran ng Tsina na magsasagawa ng komprehensibong hakbangin para kontrolin at hawakan ang nakakalasong kemikal na tumagas dahil sa malalakas na pagsabog sa imbakan noong ika-12 ng buwang ito.
Ipinagdiinan nilang pabibilisin ang pagsasaayos sa tubig na kontaminado ng cyanide sa exclusion zone na itinayo sa pamamagitan ng dike para maiwasan ang polusyon sa tubig sa labas nito.
Batay sa official samples, ang cyanide sa tubig sa loob ng exclusion zone ay mahigit 350 beses na mas mataas sa safe level. Samantala, karamihan sa tubig sa labas ng nasabing sona ay naaayon sa pambansang pamantayang panseguridad.
Kasabay nito, 73 istasyon sa lugar na sumasaklaw sa limang kilometro kuwadrado ang naitayo ng environmental authorities para magdetekta at isaayos ang kontaminasyon sa lupa.
Noong gabi ng ika-12 ng buwang ito, dalawang malakas na pagsabog sa imbakan ng mga delikadong kemikal na kinabibilangan ng humigit-kumulang 700 toneladang sodium cyanide ang yumanig sa Tianjin, port city sa dakong hilaga ng Tsina.
Sandaa't labing-apat (114) katao ang namatay, at 69 na iba pa ang nawawala.
Samantala, 648 ang ginagamot pa rin sa ospital at 53 sa mga ito ang nasa malubhang kalagayan.
Salin: Jade
