Pinabulaanan ntiong Martes, Hunyo 11, ni Geng Shuang, Tagapagsalita ng Ministring Panlabas ng Tsina ang pananalita ni Kalihim Mike Pompeo hinggil sa isyu ng Xinjiang, dahil sa kakulangan sa mga may kinalamang karunungan at kaalaman.
Ani Pompeo, di kukulangin sa isang milyong Muslim ang idinetine ng pamahalaang Tsino sa mga "re-education camp" sa Xinjiang. Kasabay nito, sinisira din ng Tsina, dagdag ni Pompeo, ang kalayaang panrelihiyon ng mga kabahayang Muslim at tinatangkang lipulin ang kulturang Uyghur at pananampalatayang Islamiko.
Bilang tugon, sinabi ni Geng na di-umiiral ang mga di-umano'y "re-education camp" sa Xinjiang. Sa halip, legal na isinasaoperasyon ang mga sentro ng bokasyonal edukasyon at pagsasanay na naglalayong tulungan ang mga mamamayang apektado ng kaisipang terorista at ekstrimista. Ito'y upang magkaroon sila ng kahusayan, para matustusan ang sarili at muling makisalamuha sa lipunan. Bunga nito, tatlong taon singkad na walang naganap na pangyayaring teroristiko sa Xinjiang, dagdag pa ni Geng.
Diin ni Geng, tinatamasa ng iba't ibang lahi sa Xinjiang ang kalayaan sa pananampalataya, ayon sa batas. Aniya, mahigit 24,400 moske ang matatagpuan sa Xinjiang, ibig sabihin, bawat 530 Muslim ay may akses sa isang moske. Ayon naman sa bukas na datos, wala pa sa 1/10 ng sa Xinjiang ang bilang ng mga moske sa buong Amerika, dagdag pa ni Geng.
Saad din ni Geng, maayos na pinoprotektahan at kinakalat ang kulturang Uyghur, at ang lahat ng mga grupong etniko sa Xinjiang ay may karapatang gumamit ng sariling wikang panlahi.
Salin: Jade
Pulido: Rhio
