Ipinahayag ng Tsina ang pag-asang mararating ng pamahalaan at oposisyon ng Venezuela ang pagkakasundo sa lalong madaling panahon. Pinasalamatan din ng Tsina ang pagsisikap dito ng Norway at iba pang mga bansa.
Winika ito ni Geng Shuang, Tagapagsalita ng Ministring Panlabas ng Tsina sa regular na preskon nitong Martes, Hulyo 9, kaugnay ng katatapos na ikatlong round ng talastasan ng pamahalaan at oposisyon ng Venezuela, sa pamamagitan ng Norway.
Diin ni Geng, hindi nagbabago at malinaw ang paninindigan ng Tsina sa isyu ng Venezuela, ibig sabihin, kailangang lutasin ito ng pamahalaan at oposisyon ng bansa, sa pamamagitan ng inklusibo at kusang-loob na diyalogong pulitikal, sa ilalim ng balangkas ng Saligang Batas. Sa prosesong ito, kailangang sundin ang Karta ng United Nations (UN) at mga saligang norma ng pandaigdig na relasyon, dagdag pa ni Geng. Umaasa aniya ang Tsina na igagalang ng komunidad ng daigdig ang mga prinsipyo ng pandaigdig na batas at alinsunod dito, gaganap ng konstruktibong papel, para matulungang marating ang kalutasang pulitikal hinggil sa isyu ng Venezuela.
Salin: Jade
Pulido: Rhio