Inilabas Linggo, Agosto 18, 2019 ng United Nations Assistance Mission in Afghanistan (UNAMA) ang pahayag bilang kondemnasyon sa suicide bombing attack na naganap Sabado ng gabi sa dakong kanluran ng Kabul, kabisera ng Afghanistan.
Sa nasabing pahayag, kinondena ni Tadamichi Yamamoto, Espesyal na Kinatawan ng Pangkalahatang Kalihim ng UN sa Isyu ng Afghanistan at namamahalang tauhan ng UNAMA, ang sinadyang pang-aatake na nakatuon sa mga sibilyan. Binigyang-diin niyang dapat palakasin ang umiiral na hakbangin ng pangangalaga, at parusahan ang mga may kagagawan ng pag-oorganisa at paglulunsad ng ganitong uri ng pag-atake.
Aniya, patuloy na magpupunyagi ang UN, kasama ng mga mamamayang Afghan, para mapasulong ang prosesong pangkapayapaan ng Afghanistan.
Sumabog Sabado ng gabi ang bomba sa isang auditoryum sa kanlurang Kabul. 63 katao ang namatay, at mahigit 180 iba pa ang nasugatan. Inamin ng ekstrimistang organisasyong Islamic State (IS) na sila ang may kagagawan ng insidenteng ito.
Salin: Vera