Nagtagpo Lunes ng umaga, Nobyembre 18, 2019 sa Bangkok, Thailand sina Wei Fenghe, Kasangguni ng Estado at Ministro ng Tanggulang Bansa ng Tsina, at Mark Esper, Kalihim Pandepensa ng Amerika.
Sa isang news briefing sa Bangkok nang araw ring iyon, isinalaysay ni Wu Qian, Tagapagsalita ng Ministri ng Tanggulang Bansa ng Tsina, na positibo at konstruktibo ang nasabing pagtatagpo. Aniya, nagpalitan ng kuru-kuro ang kapuwa panig hinggil sa relasyon ng dalawang hukbo at mga mainit na isyung panrehiyon at pandaigdig na kapuwa nila pinahahalagahan. Nagkaroon din sila ng ilang komong palagay, dagdag ni Wu. Ipinalalagay aniya ng kapuwa panig na ang relasyon ng dalawang hukbo ay mahalagang bahagi ng relasyong Sino-Amerikano, at ang pagpapaunlad ng malusog at matatag na relasyon ng mga hukbo ay hindi lamang makakabuti sa dalawang bansa at kani-kanilang hukbo, kundi makakatulong din sa kapayapaan at katatagan ng rehiyon at daigdig. Dagdag ni Wu, dapat ipatupad ng mga departamentong pandepensa at hukbo ng dalawang bansa ang mga mahalagang komong palagay na narating nina Pangulong Xi Jinping ng Tsina at Pangulong Donald Trump ng Amerika, at panatilihin ang regular na pag-uugnayan sa larangan ng seguridad na pandepensa. Dapat din palalimin ang pragmatikong kooperasyon, maayos na pangasiwaan at kontrolin ang alitan, at gawin ang positibong ambag para sa pagpapasulong ng relasyong Sino-Amerikano, kung saan ang batayan ay koordinasyon, kooperasyon at katatagan, ani Wu.
Salin: Vera