Pinagtibay kamakailan ng Kongreso ng Amerika ang Hong Kong Human Rights and Democracy Act. Hiniling ng akto sa pamahalaang Amerikano na isagawa ang taunang pagtasa sa kalagayan ng awtonomiya, demokrasya, at karapatang pantao ng Hong Kong. Ayon pa rin sa akto, ang resulta ng pagtasa ay magiging pamantayan para ipasiya ng panig Amerikano kung bibigyan ng preperensyal na pakikitungo sa aspekto ng kabuhayan at kalakalan ang Hong Kong, at kung papatawan ng sangsyon ang mga opisyal o entidad ng pamahalaan ng Espesyal na Rehiyong Administratibo ng Hong Kong.
Ang naturang aksyon ay tipikal na "long-arm jurisdiction." Sa pamamagitan ng lokal na batas, nakikialam ang panig Amerikano sa suliranin ng Hong Kong na kabilang sa suliraning panloob ng Tsina. Labag ito sa tuntunin ng United Nations na hindi dapat isagawa ng anumang bansa ang tuwiran o di-tuwirang pakikialam sa suliraning panloob at diplomasiya ng ibang bansa, at hindi dapat gamitin ang mga hakbanging pulitikal, militar, ekonomiko, at iba pa, bilang banta sa ibang bansa.
Ang suliranin ng Hong Kong ay suliraning panloob ng Tsina. Batay sa pandaigdig na batas at saligang norma ng relasyong pandaigdig, hindi dapat makialam dito ang anumang bansa, organisasyon, o indibiduwal. Ang naturang aksyon ng panig Amerikano ay tiyak na lalabanan ng panig Tsino.
Salin: Liu Kai