Pork Barrel, matagal ng kontrobersyal
SINABI ni Lingayen-Dagupan Archbishop Socrates B. Villegas na bago pa man lumabas ang eskandalong nagkakahalaga ng P 10 bilyon, matagal ng mayroon itong masamang reputasyon ang pork barrel. Ipinagtatanong niya kung ilan nang mga tradisyonal politicians ang tumakbo at gumastos ng labis at nakapatay pa ng kapwa dahilan sa milyun-milyong pisong makakamal sa oras na magwagi dahilan sa pork barrel – ang pondong inilalaan para sa mga kongresista at mga senador.
Sa kanyang apat na pahinang pastoral statement, sinabi ni Arsobispo Villegas na bagama't hindi sila mga politiko o abogado, socio-economic planners at strategists, sila nama'y naninindigan sa larangan ng ethical at moral standards. Hindi umano ipinagbabawal ng pagkakahiwalay ng Simbahan at Estado ang moral ethical values na nararapat makaimpluensya ng lipunan. Ang salaping nagmula sa mga mamamayan ay nararapat gastusin sa mga palatuntunan sa pangangailangan ng mahihirap.
Lumalabas umanong discretionary funds ng mga politiko ang kanilang mga pork barrel funds. Ipinaliwanag din ni Arsobispo Villegas na ang pagpapagawa ng mga tulay at lansangan ay gawain ng Ehekutibo at hindi ng mga kasapi ng Lehislatura.
Nanawagan siya sa mga alagad ng Simbahan sa Pangasinan, sa Lingayen-Dagupan, na walang hihingi ng pondo upang huwag nang matuksong kumuha ng salapi ang mga politiko sa jueteng at pork barrel. Ipinaalala niya sa mga Katoliko ang kasabihang "Ang sinungaling ay kapatid ng magnanakaw."
Sa panig ng pamahalaan, hayaan na lamang ng mga mambabatas ang pagpapagawa ng mga pagawaing bayan sa Ehekutibo at ang pagpapanday ng batas ang kanilang pagtuunan ng pansin.
1 2 3 4
