|
||||||||
|
||
Ulat ni Melo 20140513
|
MAY 13 mga senador at anim na dating mga senador ang sinasabing nasa talaang pinangalanang "Napolist," na nasangkot sa P 10 bilyong pork barrel scam na mula sa negosyanteng si Janet Lim Napoles.
Isang talaan ang napasakamay ng GMA News ang sinasabing kinasasangkutan ng isang miyembro ng gabinete, si Budget Secretary Florencio "Butch" Abad.
Naglabas ng pahayag si G. Abad at nagsabing wala siyang anumang pakikipag-usap kay Gng. Napoles. Ang pagsasangkot umano sa kanya sa iskandalo ay isang bahagi ng pagtatangkang pabagsakin ang kasalukuyang administrasyon.
Sa isang text message sa mga reporter, sinabi ni Kalihim Herminio Coloma, Jr. na wala silang pipiliin o itatangi at pababayaan ang ebidensyang makakamtan na maging sandigan ng pagsisiyasat.
Ani Kalihim Coloma, "malinaw ang batayang prinsipyong itinakda ni Pangulong Aquino: hayaang ituro ng ebidensya ang direksyon ng pagsisiyasat. Walang hinihiwalay o kinakampihan, basta't kongretong ebidensya ang batayan."
Maliban sa naunang pinangalanang mambabatas na sina Senate Minority Leader Juan Ponce Enrile, mga Senador Jose "Jinggoy" Estrada at Ramon "Bong" Revilla, Jr. na nakasuhan na ng plunder, idinawit pa rin sina Senador Alan Peter Cayetano, Pilar Juliana Cayetano, Francis Escudero, Gregorio Honasan II, Manuel Lapid, Loren Legarda, Ferdinand Marcos, Jr., Aquilino Pimentel III, Miriam Defensor Santiado at Vicente Sotto III.
Idinawit din sina dating Senador Edgardo Angara, Joker Arroyo, Robert Barbers (namayapa na), Teresa Aquino-Oreta, Ramon Magsaysay, Jr at Manuel Villar, Jr.
Tumanggi kaagad si Senador Escudero sa akusasyon. Wala umano siyang pakikipag-ugnayan kay Gng. Napoles at sa kanyang mga NGO.
© China Radio International.CRI. All Rights Reserved. 16A Shijingshan Road, Beijing, China. 100040 |