Kalakhang Maynila, binaha
APETADO ANG VISIBILITY SA LAKAS NG ULAN. Halos hindi makita ang mga nasa unahang sasakyan sa lakas ng ulan at hampas ng hangin. Ito ang larawang kuha sa Roxas Blvd. sa Maynila samantalang hinahampas ng malakas na ulan at hangin dala ng habagat na nahigop ni "Mario." (Melo M. Acuna)
NAGSISIMULA NG BUMAHA. Ito ang karaniwang larawan ng mga lansangan sa Metro Manila kaninang umaga. Kuha ang larawang ito sa Quirino Avenue sa Maynila. (Melo M. Acuna)
MATINDING pag-ulan ang naranasan ng Kalakhang Maynila at mga karatig pook dala ng bagyong si "Mario" kaya't maraming mga paaralan ang nagsuspinde ng klase at mga tanggapang nagsara tulad ng Department of Foreign Affairs, Passport section, House of Representatives, Supreme Court of the Philippines at iba pa.
Iniulat ng Metro Manila Development Authority na ilang bahagi ng Epifanio delos Santos Avenue ang binaha tulad ng harap ng Centris at hindi madaanan ng lahat ng uri ng sasakyan. May baha rin sa Edsa White Plains sa Quezon City at EdSA Tramo sa Pasay City.
Binaha rin ang EdSA Corner Quezon Avenue at Balara sa may Commonwealth Avenue.
Baha rin ang bahagi ng Congressioal Avenue, ang C-5 sa may Tiendesitas sa Pasig at hanggang tuhod naman ang baha sa Katipunan Avenue sa may Ateneo de Manila University.
Hindi rin makaraan ang mga sasakyan sa Espana Boulevard at sa Taft Avenue sa Maynila.
Mula sa Bangko Sentral ng Pilipinas, kasunod ng pahayag ng Malacanang na suspendido ang trabaho sa mga tanggapan ng pamahalaan sa Kalakhang Maynila, suspendido rin ang clearing operations para sa araw na ito. Sa ilalim ng BSP guidelines, ang clearing operations ay suspendido kung maibabalita kaagad ang pagkakasuspinde ng pasok sa pamahalaan bago sumapit ang ika-siyam ng umaga.
1 2 3 4 5 6
