Oxfam, nanawagan sa pamahalaan
MARAPAT na ipatupad ang relocation plans at igalang ang karapatan ng mga biktima.
Ito ang panawagan ng Oxfam halos isang taon matapos manalasa ang bagyong "Yolanda" sa Eastern Visayas. Karamihan umano ng may 200,000 pamilya na kinilala para sa resettlement ng pamahalaan ang naninirahan sa bunkhouses, mga tahanang inayos sa pamamagitan ng mga bahaging kinahoy sa mga nasirang gusali at maging mga tolda.
Upang matugunan ang pangangailangan ng mga mamamayan, inanyayahan ng international aid group na Oxfam ang mga kinatawan ng pamahalaan at international agencies sa isang round-table discussion na "The Right Move? Resettlement One Year on from Yolanda."
Ipinagutos ni Pangulong Aquino ang pagkakaroon ng 'no-build zone' may 40 metro mula sa baybay-dagat kasunod ng daluyong na dala ni "Yolanda." Inilabas ng Office of the Presidential Adviser on Rehabilitation and Recovery ang direktiba na kilalanin ang mga pook na ligtas, 'di ligtas and kontroladong mga pook base sa geo-hazard mapping.
Ayon sa Oxfam, samantalang masasabi ang mga 'di ligtas na mga pook ayon sa pagsusuri at pag-aaral, kailangang maliwanag ng pamahalaang pambansa kung paano maipatutupad ng pamahalaang-lokal ang palatuntunan ayon sa local development at land-use plans. Mga mangingisda ang tinamaan ng bagyong "Yolanda." Mga naninirahan sa mga baybay-dagat ang nakatakdang ilipat. Ang kakulangan ng public land ang magiging dahilan na mailalayo ang mga mangingisda sa kanilang hanapbuhay.
1 2 3 4 5 6
