HINDI dumalo sa preliminary investigation si Private First Class Joseph Scott Pemberton sa usaping pagpatay kay Jeffrey Laude.
Sa pagdinig sa Olongapo City Prosecutor's Office na napanood sa telebisyon, sinabi ng abogado ni Pemberton na ibinigay ang subpoena sa suspect noong ika-17 ng Oktubre at hindi na kinailangan ang kanyang pagdalo sa pagsisiyasat.
Ayon kay Atty. Rowena Flores, binigyan lamang si Pemberton ng 10 araw, hanggang ika-27 ng Oktubre na magsumite ng counter-affidavit. Ito ang sinabi ni Atty. Flores kay Prosecutor Emilie Fe delos Santos.
Idinagdag ng abogada na gagamitin niya ang sampung araw upang pag-aralan ang usapin at ang iba't ibang mga dokumento na isinumite ng mga nagreklamo bago magsumite ng counter-affidavit.
Ayon naman kay Prosecutor delos Santos, nararapat humarap si Pemberton sa susunod ng preliminary investigation sa Oktubre 27.
Akusado si Pemberton ng pagpatay sa isang Filipino sa isang hotel sa Olongapo City at pinaniniwalaang nabibimbin sa USS Peleliu na nakadaong sa Subic Port.
Apat na iba pang Americanong kawal na sinabing saksi ang hindi dumalo sa preliminary probe. Ayon sa Kagawaran ng Ugnayang Panglabas, nakaalis na sila ng bansa.
1 2 3 4 5
