|
||||||||
|
||
20141029melo
|
IPINARATING ng dating provincial administrator ng Iloilo ang reklamong graft at plunder laban kay Senate President Franklin M. Drilon, Tourism Secretary Ramon Jimenez at Public Works Secretary Rogelio Singson at iba pang opisyal sa Ombdusman sanhi ng sinasabing overpriced construction ng Iloilo Convention Center.
Inakusahan ni Manuel Mejorada ang mga opisyal ng malversation of public funds, paglabag sa procurement law, anti-graft and corrupt practices act at kawalan ng katapatan (dishonesty) kasama na ang grave misconduct.
Ang dalawang reklamo ay nag-ugat sa sinasabing overpriced Iloilo Convention Center, sinasabing nagkakahalaga ng P 700 milyong pet project ni Drilon na itinayo ng Hilmarcs Construction Corporation, ang kontratista ng sinasabing overpriced Makati parking building.
Ayon kay Mejorada, si Drilon ang nasa likod ng sinasabing overpriced convention center.
Sa isang panayam sa radyo, sinabi ni Mejorada na si Senate President Drilon ang namuno sa proyekto, siya ang naka-isip nito at siya rin ang lumakad upang magkaroon ng proyekto.
Idinagdag pa ni Mejorada na mayroon siyang mga dokumento upang patunayan ang maneobra sa bidding process. Niluto umano ang bidding ng Iloilo Convention Center ni Senador Drilon.
Naglaan umano si Senate President Drilon ng P 200 milyon mula sa kanyang Priority Development Assistance Fund (PDAF), P 200 milyon mula sa Department of Tourism at P 100 milyon mula sa Disbursement Acceleration Program ng Malacañang. Magugunitang ilang bahagi ng DAP ang deklaradong taliwas sa Saligang Batas ayon sa Korte Suprema.
Idinagdag pa ni G. Mejorada na may dagdag na P 200 milyon mula sa DAP. Ang halaga ng pagtatayo ng gusali ay lumago mula sa P 192 milyon at nakaabot sa P 488 milyon. Matatapos ang proyekto sa darating na Marso 2015.
Maliban kina Senador Drilon, Kalihim Jimenez at Singson, kinasuhan din si Tourism Infrastructure and Enterprise Zone Authority board director Mark Lapid, DPWH Undersecretaries Jaime Pacanan at Romeo Momo, DPWH Regional Director Edilberto Tayao, DPWH Iloilo Engineer Marilyn Celis, W. V. Coscolluela and Associates at Hillmarcs Construction Corporation.
Nilinaw ni G. Mejorada na walang bahid ng politika ang kanyang reklamo.
© China Radio International.CRI. All Rights Reserved. 16A Shijingshan Road, Beijing, China. 100040 |