Kumusta po ang kainan noong nakaraang selebrasyon ng Pasko't Bagong Taon? Huhulaan ko, medyo napalakas ang kain n'yo ano? Syempre naman, kaliwa't kanan ang party at kung minsan, di rin maiwasan ang mapainom dahil matagal hindi nagkita ang tropa. Eh, mayroon na ba kayong napiling pan-detox para magpagpag ng timbang? Maiigi po kung magsisimula kayo ng exercise program. Pero, bago po kayo sumugod sa gym, kumunsulta muna sa inyong doktor para siguradong ligtas ang inyong pag-eehersisyo. At kapag okay po sa inyong doktor na kayo ay mag-ehersisyo, subukan ninyo ang mga ehersisyong low-intensity para hindi masyadong nakakapagod, lalo na doon sa mga first-timer. Maganda rin po sa pagbabawas ng timbang ang ating pambansang laro at greatest cultural export ng Pilipinas, ang Arnis. Diyan po sa Luneta, marami ang nagpapraktis niyan tuwing linggo. Gumaganda na ang katawan ninyo, nai-po-promote pa ninyo ang kulturang Pilipino! Siyempre, marami pa pong uri ng ehersisyo na pwede ninyong gawin. Basta gusto ninyo at masaya kayo, go lang po. Para gumanda ang ating pangangatawan.
Alam po ninyo, mga kababayan, gaya rin sa atin diyan sa Pilipinas, marami ring mga Tsino ang bumibigat ang timbang pagkatapos ng mahabang bakasyon, gaya ng Spring Festival o Chinese New Year. Pero, alam po ba ninyo na mayroon ngayong ehersisyo rito sa Beijing na swak na swak na bansagan bilang taba buster, at ito ay imported pa mula sa Brazil? Ito po ang martial art na kung tawagin ay Capoeira. Ang Beijing ay isa na ngayong internasyonal na lunsod, at matatagpuan dito ang ibat-ibang bagay na karaniwan mong makikita sa ibang lunsod sa Europa at Amerika. Pero, ang Capoeira, tulad ng ating Pambansang Larong Arnis ay kalian lamang naipakilala sa Beijing. Maganda ang Capoeira sa pagpapalakas ng katawan at pagpapataas ng pleksibilidad. Tamang tama sa pagpapagpag ng taba mula sa mahabang bakasyon.
Ang Capoeira ay nagsimula sa Brazil noong mga 1700s. Pero, ang aktuwal na pinagmulan at kung kailan ito nagsimula ay hindi matiyak dahil kakaunti lamang ang mga nasusulat na dokumentong nagbabanggit nito.
Isa lang ang sigurado, ang sinaunang bersyon ng Capoeira ginamit ng mga aliping mula sa Aprika upang ipagtanggol ang sarili mula sa mga mapang-abusong amo.
Sa ngayon, ang Capoeira ay isa nang ganap na martial art, at active exporter ng kultura ng Brazil. Ito ay opisyal na kinokonsiderang intangible cultural heritage ng Brazil.
