1 Mayor Estrada, mananatili sa puwesto
KWALIPIKADONG tumakbo sa pagka-alkalde ng Maynila si dating Pangulong Joseph Estrada noong 2013 ayon sa naunang desisyon ng Commission on Elections na sinangayunan ng Korte Suprema sa desisyong inilabas kanina.
Ang Korte Suprema, sa desisyong nilagdaan ni Associate Justice Teresita Leonardo de Castro, ang nagpawalang-saysay sa pinagsama-samang mga petisyon nina dating Manila Mayor Alfredo S. Lim, ang kandidatong tinalo ni G. Estrada noong 2013, at ng kanyang abogadang si Alicia Risos-Vidal.
Si De Castro ang chairperson ng Sandiganbayan Special Division na humatol kay Estrada sa usaping plunder.
Nagkaroong 11-3 boto na sumangayon sa desisyon ng Commission on Elections, sa pagkilala sa kapatawarang ibinigay ni dating Pangulong Gloria Macapagal-Arroyo kay Estrada matapos mapatunayang nagkasala.
Ayon kay Public Information Chief Atty. Theodore Te sa isang press conference na karamihan sa mga mahistrado ang kumilala sa pagpapatawad kay Estrada bilang absolute kaya't balik na ang mga karapatan ni G. Estrada bilang kandidato sa halalan noong 2013.
Ang pagtanggap ni G. Estrada ng absolute pardon ang nag-alis ng disqualification mula sa Section 40 ng Local Government na may relasyon sa Section 12 ng Omnibus Election Code.
Ang tatlong kontra sa desisyon ng nakararami ay sina Chief Justice Ma. Lourdes Sereno, Senior Association Justice Antonio Carpio at Associate Justice Marvic Leonen. Hindi lumahok sa botohan si Associate Justice Francis Jardeleza.
Ayon sa mga nagpetisyon, ang conviction at hatol na mabilanggo ng habang-buhay ay sapat nang dahilan upang hindi na mapahintulutang tumakbo sa anumang halalan. Nagpasalamat naman si Mayor Estrada sa Korte Suprema sa pamamagitan ng kanyang Twitter account.
1 2 3 4 5 6
