Sa magkahiwalay na okasyon sa Bandar Seri Begawan, Brunei, nakipag-usap kahapon si Premyer Li Keqiang ng Tsina kina Pangulong Thein Sein ng Myanmar, Punong Ministrong Najib Tun Razak ng Malaysia, Punong Ministrong Tony Abbott ng Australia, at Kalihim ng Estado John Kerry ng Estados Unidos.
Sa pakikipag-usap kay Thein Sein, sinabi ni Li na positibo ang Tsina sa pagpapasulong ng Myanmar sa proseso ng pambansang konsilyasyon. Nakahanda aniya ang Tsina na magsikap, kasama ng Myanmar para pangalagaan ang katatagan sa rehiyon ng hanggahan ng dalawang bansa. Ipinahayag naman ni Thein Sein na bilang tagapangulong bansa ng ASEAN sa taong 2014, magsisikap ang Myanmar para pasulungin ang relasyon sa pagitan ng Tsina at ASEAN.
Nang kausapin si Najib Tun Razak, sinabi ni Li na sa bisperas ng ika-40 anibersaryo ng pagkakatatag ng relasyong diplomatiko ng Tsina at Malaysia, nakahanda ang Tsina na magsikap, kasama ng Malaysia para kapuwa pasulungin ang estratehikong pakikipagtulungan ng Tsina sa Malaysia at ASEAN sa ibat-ibang larangan. Ipinahayag naman ni Najib na positibo ang Malaysia sa mungkahi ni Li sa 10+1 Summit, tungkol sa pagpapalakas ng naturang kooperasyon. Nakahanda aniya ang kanyang bansa para sa pagpapasulong ng relasyon ng Tsina at ASEAN.
Sa pakikipag-usap kay Tony Abbott, sinabi ni Li na umaasa siyang susulong ang kooperasyon ng Tsina at Australia sa larangan ng kabuhayan, kalakalan at pinansya, at pabibilisin ang free trade agreement negotiation. Sinabi naman ni Abbott na positibo ang kanyang bansa sa pagpapabilis ng talastasang nabanggit.
Nang katagpuin si John Kerry, ipinahayag ni Li na sinusubaybayan ng Tsina ang isyu ng debt deadline ng Amerika. Aniya, umaasa siyang palalawagin ng Amerika ang high-tech products export papunta sa Tsina. Sinabi naman ni Kerry na bilang importanteng cooperation partner ng Amerika, positibo ito sa kaunlaran ng Tsina.