NANAWAGAN si Health Undersecretary Kenneth Hartigan-Go sa madla na makipagtulungan upang masugpo ang pagkalat ng mga pekeng gamot sa pamilihan.
Ipinaliwanag niyang ang mga palsipikadong gamot, ayon sa World health Organization ay mga gamot na sinadyang mali ang mga etiketa. Ang mga ito ay hindi makagagaling at maaaring mayroong maling laman kungdi ma'y walang anumang mapakikinabangang laman. Kung sakali mang tama ang laman ng gamot, maaaring hindi sapat ayon sa ipinapayong dosage ng mga manggagamot.
Ang paggamit ng mga palsipikadong gamot ay maaaring makasama pa sa katawan ng tao na mauuwi sa sa pagkaka-ospital at posibleng makasama sa kalusugan at makamatay pa.
Illegal ang paggawa ng palsipikadong gamot at isang malaking panganib sa buhay ng mga mamamayan lalo pa't ang pagkalat nito ay malaking pasanin ng health services ng alinmang pamahalaan.
Sapagkat obligasyon ng pamahalaang ipagsanggalang ang mga mamamayan, naglabas ang pamahalaan ng batas na kumikilala sa Food and Drug Administration na siyang lead agency sa paglaban sa mga sindikatong gumagawa ng palsipikadong gamot. Kasama sa kanilang programa ang mga ahensyang tulad ng Department of Trade and Industry, Bureau of Customs,. Intellectual Property Office of the Philippines, National Bureau of Investigation, PNP-Criminal Investigation and Detection Group, Philippine Center on Transnational Crime, Philippine Drug Enforcement Agency at Dangerous Drugs Board.
Noong nakalipas na Hulyo, limang parmasya sa Cebu, Mandaue, Talisay at Naga ang sinalakay sa pagbibili ng mga gamot na pinaniniwalaang palsipikado sa mas murang halaga kaysa mga tgunay na gamoty.
Hindi lamang krimen ang paggawa ng mga palsipikadong gamot, Ito na ang pinakamalaking pagkakitaan ng mga pandaigdigang sindikato, kaya't mahalaga ang pagsasama-sama ng mga regulasyon at mga ahensya ng pamahalaan, dagdag pa ni Undersecretary Hartigan-Go.
