Ipinahayag kahapon, Martes, ika-29 ng Enero 2019, ni Kalihim Delfin Lorenzana ng Kagawaran ng Tanggulang Pambansa, na ang Abu Sayyaf ang nasa likod ng teroristikong pag-atake sa Jolo, Sulu. Dagdag niya, isinasagawa na ng panig militar ang operasyon, para mapuksa ang grupong ito.
Sinabi ni Lorenzana, noong Agosto ng nagdaang taon, natanggap ng panig militar ang impormasyong may tangka ang Abu Sayyaf na gawin ang teroristikong pag-atake sa mga lunsod sa katimugan ng bansa na gaya ng Jolo at Zamboanga. Pagkaraan nito, pinalakas aniya ng panig militar ang pagbabantay sa naturang mga lunsod, pero hindi pa rin napigilan ang naganap na pag-atake sa Jolo.
Ayon naman sa panig militar, simula kahapon, ipinadala ang mga tropang panlupa sa Sulu para sa operasyon laban sa Abu Sayyaf. Nang araw ring iyon, isinagawa rin ng mga eroplanong militar ang air raid sa mga kuta ng naturang grupo.
Salin: Liu Kai