Sinabi kamakailan ni Pangulong Donald Trump ng Amerika, na dapat maghanap ang mga kompanyang Amerikano ng kahaliling plano para sa kanilang negosyo sa Tsina, na gaya ng pag-alis ng bansang ito at pagbalik sa Amerika. Kaugnay nito, ipinahayag kahapon, Lunes, ika-26 ng Agosto 2019, ni Tagapagsalita Geng Shuang ng Ministring Panlabas ng Tsina, na ang palagay na ito ay labag sa mga prinsipyo ng market economy, malayang kompetisyon, at globalisasyong pangkabuhayan. Ito aniya ay tututulan ng lahat ng may kinalamang panig.
Sinabi ni Geng, na bilang reaksyon sa nabanggit na pananalita ni Trump, bumaba ang stock market at presyo ng mga pangunahing paninda ng Amerika, ipinahayag ng iba't ibang sektor ng Amerika ang pagtutol, at ipinahayag naman ng komunidad ng daigdig ang pagkabahala. Aniya, ang paghihiwalay ng kabuhayan ng Tsina at Amerika ay magbabanta sa kaligtasan ng global industrial chain at supply chain, magdudulot ng kaligaligan sa pandaigdig na pamilihang pinansyal, at makakaapekto sa paglaki ng pandaigdig na kabuhayan at kalakalan. Inulit din niyang, ang paghihilaway sa kabuhayang Tsino ay nangangahulugan ng paghihiwalay sa pagkakataon, daigdig, at kinabukasan.
Salin: Liu Kai
