Bilang espesyal na sugo ni Pangulong Xi Jinping ng Tsina, lumahok si Wang Yi, Kasangguni ng Estado at Ministrong Panlabas, sa Climate Action Summit ng United Nations (UN), na idinaos nitong Lunes, ika-23 ng Setyembre 2019, sa New York.
Ipinahayag ni Wang, na buong taimtim na ipapatupad ng Tsina ang mga obligasyon nito sa ilalim ng UN Framework Convention on Climate Change at Paris Agreement, at isasakatuparan batay sa iskedyul ang mga nakatakdang target bilang ambag sa pandaigdig na pagharap sa pagbabago ng klima. Ito ay isa pang pahayag ng Tsina sa pandaigdig na okasyon hinggil sa pagpapatupad ng mga pangko sa pagharap sa pagbabago ng klima, at ipinakikita nito ang determinasyon at tungkulin ng Tsina sa isyung ito, bilang isang responsableng malaking bansa.
Sa panahon ng kasalukuyang summit, bukod sa pagpapalabas ng nabanggit na pahayag, bilang bansang tagapagkoordina, ini-organisa rin ng Tsina ang pagtalakay hinggil sa pagharap sa pagbabago ng klima sa pamamagitan ng mga solusyon batay sa kalikasan. Kaugnay ng mga ambag ng Tsina sa summit, sinabi ni Pangkalahatang Kalihim Antonio Guterres ng UN, na napakahalaga ng namumunong papel ng Tsina sa aspekto ng mga aksyon bilang tugon sa pagbabago ng klima.
Sa kasalukuyan, pumasok sa masusing yugto ang pandaigdig na pagharap sa pagbabago ng klima. Ang prinsipyo hinggil sa komon pero magkakaibang responsibilidad ng mga maunlad at umuunlad na bansa ay nananatiling mahalagang tuntuning dapat tumpak na sundin. Sa isang multilateral na prosesong ito, ang paggigiit ng Tsina sa berdeng pag-unlad at pangangalaga sa ekolohiya ay patuloy na magdaragdag ng mga positibong elemento sa usaping ito.
Salin: Liu Kai