ISANG malakas na lindol ang yumanig sa Bohol at ilang lalawigan sa Gitnang Pilipinas kaninang ika-walo't labing dalawa ng umaga. May lakas itong 7.2 magnitude. Ayon sa media reports, may 32 katao na ang nasasawi.
Sa panayam kay Director Renato Solidum ng Philippine Institute of Volcanology and Seismology, ang lakas na inilabas ng pagyanig ng lupa ay maihahambing sa 32 Hiroshima bombs na naging dahilan ng pagbagsak ng ilang mga gusali't makasaysayang mga simbahan. Naging dahilan din ito ng stampede sa ilang pook.
May 16 ang nasawi sa Bohol at may 15 sa Cebu samantalang may isang daan katao ang nasugatan. May mga taong humawak ng mahigpit sa mga puno dahilan sa lakas ng pagyanig ng lupa.
Nagmula ang lindol sa lalim na 33 kilometro sa bayan ng Carmen sa Bohol na katatagpuan ngayon ng mga pagbitak ng mga lansangan at pagbagsak ng mga gusali. May mga nasawi sa Bohol ng bumagsak ang bubong sa isang fish port at sa isang pamilihan.
Nawalan ng suplay ng kuryente sa pagtatapos ng pagyanig ng halos isang minuto.
Sa Cebu, lima katao ang nasawi sa dami ng mga mamamayang nasa isang gymnasium samantalang tatanggap ng salapi. Walong iba pa ang nasugatan dahilan sa stampede.
Mas malakas umano ang lindol na ito kaysa sa tumama sa Haiti na umabot lamang sa 7.0 magnitude. Pinakamatindi ang pinsala sa Tagbilaran City sa Bohol at ang lalawigan ng Cebu. Ang pinakamalakas na lindol sa Bohol ay naganap noong Pebrero 1990 na nagkaroon ng magnitude na 6.8. Nakapinsala rin ang lindol ng ilang simbahan at mga tulay.
1 2 3 4
