PINALALAHANAN ni Chairman Eduardo del Rosario ng National Disaster Risk Reduction and Managament Council ang madla na maging maingat. Idinaan sa satellite at regional offices ang mensahe kasabay ng panawagang bantayan ang dalawang weather systems na magpapa-ulan sa bansa.
Inatasan na rin niya ang lahat ng namumuno sa regional, provincial, city at municipal disaster management councils na maging maingat. Kailangan ding makipagtulungan sa mga mamamahayag at mga broadcaster upang makarating sa lahat ang babala.
Nanawagan si G. del Rosario kasunod ng posibilidad na pumasok sa nasasakupan ng Pilipinas ang isang sama ng panahon sa silangan ng Mindanao sa darating na Huwebes. May international codename na Haiyan, ang nakita sa may Caroline Islands na may lakas na 95 kilometro bawat oras at pagbugso na aabot sa 120 kilometro bawat oras.
Mayroon ding isang low pressure area sa hilangang silangan ng Palawan na patuloy na nagpapaulan sa pook kaya't hindi makapaglayag at makapangisda ang mga mamamayan sa lalawigan.
Kasunod ito ng payo ng US Joint Typhoon Warning Center na malaki ang posibilidad na makapasok sa bansa ang malakas na bagyo sa mga susunod na araw.
Sinabi ng tanggapan na may posibilidad na tumama sa Central Philippines at dumaan sa kapuluan. Ito rin ang pahayag ng National Aeronautics and Space Administration na tatama sa lupa ang lumalakas na bagyong Haiyan sa Biyernes, ika-walo ng Nobyembre.
Maituturing itong Category 4 hurricane sa Saffir-Simpson Scale.
1 2 3 4
