Mga manggagawa, nanawagang itigil na ang contractualization
SA pagdiriwang ng Araw ng Paggawa, nanawagan ang mga opisyal at kasapi ng iba't ibang union na tapusin na ang kalakaran ng kontraktuwalisasyon kasabay ng panawagang ipasa ang Security of Tenure bill.
Ayon sa Federation of Free Workers, ang apat na taong pglago ng ekonomiya ay walang katuturan sapagkat wala namang natamong mga hanapbuhay.
Sa panayam ng CBCP Online Radio, sinabi ni Atty. Sonny Matula, pangulo ng FFW na ang paglago ng tubo ng mga kalakal ay nag-uugat sa kakulangan ng mas makataong sahod at benepisyo.
Sa karamihan ng mga pagawaan, may 30% lamang ng mga manggagawa ang regular na trabahador.
Kung magkakaroon ng security of tenure, magkakaroon sila ng kakayahang makapag-unyon at makahiling ng mas magandang benepisyo. Higit umanong lalago ang ekonomiya kung magiging regular ang mga manggagawa sa kanilang pinaglilingkuran.
Sa ginawang pulong sa Malacanang kamakalawa, ipinarating din ng mga manggagawa ang kanilang pagkabahala sa hindi pagkilos ng Bureau of Internal Revenue na magkaroon ng tax breaks ang mga manggagawa.
Binabati ng mga manggagawa ang BIR sa pagkolekta ng buwis kay Manny Pacquiao subalit hindi tulisan ang "Pambansang Kamao" at mayroong mas malalaking tao at kalakal na umiiwas sa buwis at nandaraya sa pamahalaan at mga mamamayan. Binanggit din nila ang pagsasamantala ng smugglers. Marapat umanong unahin ng gobyerno ang mga mandarambong na ito, dagdag pa ng mga manggagaawa.
Inaasahang magkakaroon ng may 30,000 mga manggagawa ang magmamartsa mula sa Welcome Rotunda patungo sa Mendiola at Quiapo Church para sa Misa ni Bishop Jessie Mercado.
1 2 3 4
