Pulisya at militar, umaasang madarakip ang mga Abu Sayyaf
PATULOY na umiinit ang situwasyon para sa mga pulis at mga kawal na dakpin ang nasa likod ng pamumugot sa Canadian national na si John Ridsdel noong Lunes sa Sulu.
Isang malaking balakid sa mga pulis at kawal ang paglalagay sa alanganin sa nalalabing hostages.
Kinondena ni Canadian Prime Minister Justin Trudeau ang pamamaslang at nangakong tutulong sa Pilipinas na habulin ang mga armadong nasa likod ng karumal-dumal na krimen.
Nakausap na ni Prime Minister Trudeau si Pangulong Benigno Simeon C. Aquino III.
Ayon kay Prime Minister Trudeau ang kanilang pag-uusap ay natuon sa pangangailangang mapanagot ang mga kriminal sa batas at kung ano ang kanilang magagawa sapagkat nababahala sila sa seguridad ng kanilang mga mamamayan sa Pilipinas subalit hindi sila magbabayad ng ransom.
Magugunitang inilagay sa isang plastic bag ang ulo ni Ridsdel at itinapon ng mga nakamotorsiklong militante noong Lunes ng gabi sa Jolo sa Sulu may 950 kilometro sa katimugan ng Maynila na pinagkukutaan ng mga Abu Sayyaf at mga kasamang armado na pinaniniwalaang bumihag sa may 22 banyagang hostages mula sa anim na bansa sa kanluran at Asia
Sa likod ng pangyayaring ito, tuloy ang military at police operations laban sa mga armado. Ayon sa Sandatahang Lakas ng Pilipinas, mayroong 2,000 mga kawal ang gumagalugad sa mga pook na pinaniniwalaang pinagkukutaan ng mga Abu Sayyaf. Suportado sila ng mga UH-1H helicopters at MG-520 gunships.
Pinaniniwalaang marami sa hostages ang napalaya matapos magbayad ng ransom.
1 2 3 4 5 6
