|
||||||||
|
||
PUMANAW na si dating Chief Justice Renato Corona kaninang madaling araw sa Medical City sa Pasig City. Ito ang nabatid mula sa National Transformation Council. Namayapa ang dating punong mahistrado sa edad na 67.
Nasawi ang dating chief justice dahil sa atake sa puso. Unang lumabas ang balita sa mga himpilan ng radyo at nagkaroon ng kumpirmasyon sa Twitter account ni Supreme Court Spokesman Theodore Te. Ipinag-utos na ni Chief Justice Lourdes Sereno ang paglalagas ng watawat sa lahat ng hukuman sa half-mast bilang pagluluksa.
Si Chief Justice Corona ang ika-23 punong mahistrado ng Pilipinas at unang miyembro ng Korte Suprema na napatalsik sa puesto. Nag-aral sa Ateneo de Manila mula sa mababang paaralan hanggang sa College of Law, naglingkod siya sa ilalim ng dalawang pangulo mula ng mahirang na mahistrado noong 2002.
Si Chief Justice Corona ang nabantog sa desisyon ng Korte Suprema na nagbabalik ng Hacienda Luisita sa mga magsasaka mula sa mga Cojuangco na kinabibilangan ni Pangulong Benigno Simeon C. Aquino III.
Si Chief Justice Corona rin ang namuno sa desisyon na nagpapawalang-saysay sa Executive Order No. 1 ni Pangulong Aquino na naglalayong imbestigahan ang mga ginawa ni dating Pangulong Gloria Macapagal-Arroyo.
Ibuburol ang kanyang labi sa Heritage Park mula bukas. Naulila si Gng. Cristina Basa Roco at ang kanilang tatlong supling.
| ||||
© China Radio International.CRI. All Rights Reserved. 16A Shijingshan Road, Beijing, China. 100040 |