Benham Rise, mahalaga sa food security ng Pilipinas
SINABI ni Agriculture Secretary Emmanuel Pinol na mahalaga ang Benham Rise sa food security ng Pilipinas. Ito ang kanyang pahayag matapos ang tatlong araw na pagdalaw sa 13 milyong ektaryang nasasakupan ng Pilipinas na tinaguriang underwater plateau.
Iniulat ni Kalihim Pinol kay Pangulong Duterte na isang mayamang pangisdaan ang Benham Rise na kailangang maipagsanggalang at mabantayan laban sa sobrang pangingisda.
Kailangang magkaroon ng pasilidad ang Pilipinas sa Benham Bank, ang pinakamababaw na bahagi ng Benham Rise upang magkaroon ng research center para sa mga marine scientists, isang daungan para sa mga mangingisdang Filipino, isang pabrika ng yelo upang mapanatiling sariwa ang isda, isang himpilan ng Philippine Coast Guard at isang weather radar station.
Kasama ni G. Pinol ang mga tauhan ng Department of Agriculture, Bureau of Fisheries and Aquatic Resources na dumalaw sa Benham Rise mula noong Miyerkoles hanggang kahapon. Sinisid ng mga dalubhasa ang may 35 metrong lalim ng Benham Bank upang manaliksik. Inalam nila kung may tsansang magtayo ng isang research center sa pook.
Pinamunuan ni G. Pinol ang pagpapalutang ng 15 payao, kalahati sa target na 30 payao upang makatawag-pansin ng mga isda. May 5,000 metro ang lalim ng Benham Rise mula sa sea surface at pinagmumulan ng 43% ng isdang inilalapag sa Dinahican Port sa Infanta, Quezon.
1 2 3 4
