Happy birthday kay Megan ng Tianjin, China. Sabi niya malungkot daw ang birthday niya kasi malayo siya sa kanyang pamilya. Naku, alam ko kung ano ang nararamdaman mo. Ganyan din ako, eh. Pero, bumawi ka na lang pag uwi mo. Atsaka mayroong tinatawag ngayong video chat. Sa tingin ko, at the moment, okay na rin iyon.Parang magkalapit na rin kayo. Para na ring nagkita kayo nang personal. Happy birthday uli.

Get well soon kay JunJun ng Katipunan Road, Quezon City. Hindi mo nabanggit kung ano ang sakit mo. Nasa ospital ka ba o nasa bahay? Anyway, pagaling ka. Kasama ka sa mga dasal namin.

Happy Mother's Day kay mommy at sa lahat ng mga mommy na nakikinig ngayong gabi. Sana naman mai-celebrate ninyo to the fullest ang espesyal na araw na ito.

Alam niyo ang pagiging nanay ay hindi lang isang responsibilidad o obligasyon kundi isa ring vocation; kaya, tulad ng mga iba pang misyon, ito ay nangangailangan ng malaking sakripisyo. Ito rin ang dahilan kaya masasabi natin na ang pagdiriwang ng Mother's Day ay hindi sapat para pahalagahan natin ang hirap at pasakit ng mga nanay. Pahalagahan natin ang kanilang sakripisyo hindi lamang kung Mother's Day o Araw ng mga Nanay kundi araw-araw. Sabi ng isang kaibigan, ngayon daw ang nanay ay hindi lang "ilaw ng tahahan" kundi "haligi ng tahanan" din, kaya doble sakripisyo. Well, ang masasabi ko lang ay mabuhay kayo mga mommy!

Nagpadala kagabi ng message sa viber iyong mga dabarkads sa Adonis, Pandacan. Naroon daw sila sa Cowboy Grille kagabi at nagkakatuwaan dahil may dumating daw na galing ng Saudi. Nag-blow out daw. Hindi ko nasagot iyong message nila dahil may ginagawa ako noong mag-viber sila. Sana nakikinig kayo ngayon, guys. Sorry, ha? Hindi ko nasagot message niyo. Alam ko na super saya kayo kagabi. Basta ang masasabi ko lang, huwag kayong magmamaneho nang nakainom, okay? Malaking peligro iyan, eh.

Gusto ko uling kumustahin si Ate Precy ng Marinduque. Kumusta na pakiramdam mo ngayon, Ate? Bumubuti ba? Lakasan mo loob mo, ha? Lagi kang kasama sa mga dasal namin.

Sabi ni Melanie ng Shaw Boulevard, Mandaluyong, Metro Manila, mula raw noong magka-interes sa pagluluto ang kapatid niya, nabawasan daw ang paglabas-labas nito ng bahay kasama ng mga barkada. Ngayon daw, kung lumabas man ito ng bahay ay para lamang magpunta sa bookstore at maghanap ng cook book o bagong recipe. Ikinatutuwa raw nila ito at nagpapasalamat daw sila sa Cooking Show at sa inspiring words ng inyong lingkod.

Naku, wala kayong dapat ipagpasalamat. Ako nga ang dapat magpasalamat dahil pinag-uukulan ninyo ng panahon ang mga recipe namin at natutuwa akong makarinig ng mga ganyang feedback kasi feeling ko may maganda naman palang pinatutunguhan ang mga kaalamang isini-share namin sa mga tagapakinig. Sabihin mo sa kapatid mo na maganda nang simula iyan at pagbutihin niya ang pagluluto niya dahil mapapakinabangan niya iyan pagdating ng araw.

Gusto ko uling batiin si Mila, Mila Guerrero ng Sta. Ana, Manila. Kumusta ka na diyan? Salamat sa clippings. Natanggap ko na last Friday. Super salamat talaga. Siyempre, mapapakinabangan ko lahat iyon.

Iyong mga kababayan na nagtatrabaho sa Yemen at Libya ayaw pa ring magsiuwi kahit delikado na ang situwasyon sa dalawang nabanggit na bansa. Ang katuwiran nila ay wala raw silang trabaho kung uuwi sila. Pero ang problema ay nagkakagulo ngayon sa bansa at kailangan muna nilang iligtas ang mga sarili nila. Puwede naman silang magbalik kapag nagbalik na sa normal ang kalagayan ng bansa. Ngayon, may pagkakataon pa para makauwi sila dahil puwede pa silang marating ng mga sasakyang panaklolo. Paano kung malala na ang situwasyon at gustuhin man silang tulungan ng Philippine Embassy ay wala na rin itong magagawa? Sana makapag-decide sila habang mayroon pang time at habang mayroon pang nag-aalok ng tulong.

Naka-viber ko si Fely ng San Marcelino, Zambales. Isinama raw siya ng friend niya sa Pampanga at nakakita siya for the first time ng lalaking ipinapako sa krus bilang penitensiya. Hindi raw niya ma-take. Tanong niya, "Kailangan ba nating gawin iyon?"

Sinabi ko sa kanya na hindi tayo obligado na gawin iyon. Puwede naman kasi tayong magpenitensiya sa sarili nating paraan, eh. Puwede tayong mag-volunteer as caregivers. Puwede tayong mag-engage sa charity work at pumunta sa mga bilangguan para bisitahin ang mga nakakulong doon o magpunta sa mga hospital para bisitahin ang mga maysakit. Sa tingin ko mas productive pa nga ang ganitong mga paraan, eh. Kaya hindi tayo kailangang magpenitensiya nang ganoonl. Huwag kang makokonsensiya kung hindi mo magagawa iyon. Pero hindi ko naman kini-criticize iyong mga nagpapapako sa krus bilang pagtupad sa kanilang panata kung Mahal na Araw. Personal choice nila iyon at walang makakapigil sa kanila na gawin iyon. Sila rin ang nakakaalam kung anong buti mayroon iyon para sa kanila.

Sabi ni Kristel ng Botolan, Zambales: "Ang Mahal na Araw ay Holy Day at hindi holiday kaya stick ako sa traditional ways na tulad ng Pabasa, Sinakulo, Istasyon at Bisita Iglesiya at hindi excursion, malalakas na musika at pagsasaya."

Sabi naman ni Bro. Felix ng Methodist Church Manila: "Sana sa papalapit na Holy Week, mapagbulay-bulayan natin ang Salita ng Diyos at mapag-aralan natin kung paanong mai-a-apply ito sa pang-araw-araw na pamumuhay. Kailangang kailangan natin ito sa ating spiritual upliftment."

Sabi ni Audrey ng Pulang Lupa, Las Pinas: "Oo, marami nga tayong problema sa bansa pero hindi nangangahulugan na dapat nang bumaba sa puwesto si Pangulong Aquino. Kung meron tayong alam na solusyon sa problema, ipaalam natin sa kinauukulan. Kung talagang makukumbinse ang ating mga kinauukulan sa ating solusyon, siguradong isasa-alang-alang nila ang ating suhestiyon."

Sabi naman ni Chona ng M. Adriatico, Ermita: "Gusto ko ang style ng inyong pagluluto. Madalas sa huli ninyo inilalagay ang bawang. Nakakain ito nang medyo sariwa pa at hindi tostado. Sinubok ko na rin ito nang ilang ulit. Maganda iyan. Hindi nawawala original taste ng ibang sahog."

Sabi ni Sol ng Beijing International School: "Hi, Kuya Ramon! Sana mahanap ng ating mga kinauukulan ng angkop na solusyon sa ating political crisis at kalimutan na sana ng ilang kababayan ang idea ng pagpapababa kay Pangulong Aquino. Itong huli ay maaring magresulta sa power vacuum."

Sabi naman ni Miriam ng Asturias, Sampaloc: "Sabi nila kung walang paloloko walang manloloko. Pero kung minsan kasi alam natin na lolokohin lang tayo pero we take the risk without any logical reason at all."

Salamat sa inyo, Miriam at Sol. Oo nga, ano? Kung minsan alam natin na lolokohin lang tayo pero sige pa rin tayo. Siguro kung minsan ayaw lang nating masaktan ang damdamin ng mga manloloko.

Sabi ni Jonah ng Potrero, Malabon City: "Masuwerte iyong isang kababayan natin na nag-aaral ng Chinese law sa Peking University. I understand na siya ay isang Chinese government scholar. Bihira ang ganung pagkakataon, kaya sana makumpleto niya ang kurso."

Sabi naman ni Buddy Boy Basilio ng M/V Aldavaran Singpore: "Nagustuhan ni Misis iyong recipe na Beef with Snow Peas. Ang sarap-sarap daw ng dating. Nagustuhan ata ng mga amiga niya. Sana masundan pa raw iyong recipe na iyon. Lagi raw siyang nakaabang sa mga bago ninyong recipe."