Inulit ngayong araw ng komentaryo ng People's Daily na makatwiran ang pagtanggi o di-pagdalo ng panig Tsino sa arbitrasyon na unilateral na iniharap ng Pamahalaang Pilipino hinggil sa isyu ng South China Sea (SCS).
Anang komentaryo, pinaninindigan ng Pamahalaang Tsino na ang nukleo ng alitan ng Tsina at Pilipinas hinggil sa isyu ng SCS ay may kinalaman sa soberanya sa ilang isla at reef sa Nansha Islands at sa overlapping claims ng hurisdiksyon ng katubigan sa South China Sea.
Tinukoy ng komentaryo na ang alitan sa soberanyang panteritoryo ay hindi malulutas batay sa UN Convention on the Law of the Sea (UNCLOS). Bukod dito, noong 2006, nagpalabas ang Tsina ng isang may kinalamang pahayag batay sa UNCLOS. Ayon sa pahayag, ang ganitong alitan hinggil sa hanggahang pandagat at karapatang pangkasaysayan ay hindi sakop ng UNCLOS compulsory dispute settlement mechanism.
Palagiang naninindigan ang Tsina na ang alitan hinggil sa isyu ng SCS ay kailangang lutasin sa pamamagitan ng konsultasyon at negosasyon sa pagitan ng mga may direktang kinalamang bansa. Mababasa ito sa mga kasunduan na narating ng Tsina at Pilipinas at sa Declaration on the Conduct of Parties in the South China Sea (DOC) na nilagdaan ng Tsina at mga bansang ASEAN na kinabibilangan ng Pilipinas.
Ipinagdiinan ng komentaryo na nananatiling bukas ang pinto ng Tsina sa pakikipag-usap sa Pilipinas hinggil sa isyu ng SCS. Hinimok anito ng Pamahalaang Tsino ang Pamahalaang Pilipino na sumunod sa pangako nito sa mga narating na kasunduan ng dalawang bansa at bumalik sa bilateral na pagsasanggunian.
Noong ika-22 ng Enero, ipinaalam ng Pamahalaang Pilipino sa Pamahalaang Tsino na isusumite nito ang alitan sa SCS sa UNCLOS compulsory dispute settlement mechanism.
Noong ika-30 ng Marso, pormal na isinumite ng Pamahalaang Pilipino ang arbitrasyon sa isang pandaigdig na tribunal.
