Nanumpa kahapon sa tungkulin ang magkasanib na pamahalaan ng Palestina sa Ramallah, ito ay isang palatandaan na opisyal na natapos ang 7 taong pagkakahiwalay ng Palestine National Liberation Movement (Fateh) at Palestinian Islamic Resistance Movement (Hamas), dalawang paksyon ng Palestina.
Binubuo ang bagong magkasanib na pamahalaan ng 17 miyembro, at lahat sila ay personaheng walang kinaaanibang partido. Sa kanyang talumpati sa telebisyon, sinabi ni Pangulong Mahmoud Abbas ng magkasanib na pamahalaan, na ang pagtatatag ng bagong pamahalaan ay palatandaan ng pagkakaisa ng Palestina, at natapos na ang pagkakahiwalay ng bansa.
Tungkol dito, ipinahayag ni Punong Ministro Benjamin Netanyahu ng Israel, na ang pagtatatag ng bagong magkasanib na pamahalaan sa Hamas ay nangangahulugang piniling tanggihan ni Abbas ang kapayapaan. Ayon sa pag-analisa, posibleng isasagawa ng Israel ang serye ng sangsyon hinggil sa pagtatatag nito.
Ipinahayag naman ni Jen Psaki, Tagapagsalita ng Kagawaran ng Estado ng Amerika, na nakahandang makipagtulungan ang kanyang bansa sa bagong pamahalaan ng Palestina at wala pa itong balak na itigil ang tulong sa Palestina.
Salin: Andrea