GINAGAWA ng pulisya at militar ang lahat ng paghahanda para pagdating ni Pope Francis sa Huwebes, ika-15 hanggang sa kanyang pag-alis sa Lunes, ika-19 ng Enero.
Sa idinaos na Tapatan sa Aristocrat, sinabi ni Sr. Supt. Roland Po, deputy spokesman ng Philippine National Police na umabot sa limang buwan ang kanilang paghahanda sa pagdalaw ng pinuno ng Simbahang Katolika. Mayroon silang koordinasyon sa militar upang higit na matiyak ang kaligtasan ng panauhin at ng mga mamamayang inaasahang hihigit sa limang milyong katao.
Para kay Col. Restituto Padilla, Jr., tagapagsalita ng Armed Forces of the Philippines malaki ang magiging papel ng mga mamamayan sa darating na malalaking pangyayari sa Metro Manila, Tacloban City at sa Palo, Leyte. Kailangang sumunod sa mga advisory ng pulisya at militar ang mga mamamayan.
Magkakaroon ng mahigpit na pagbabantay ang mga alagad ng batas sa mga pook na dadalawin ng Santo Papa. Kahit ang mga mamamahayag ay pinapayuhang huwag magdadala ng mga backpacks at tanging mga transparent bags ang dalhin sa Mall of Asia, sa University of Sto. Tomas at sa Quirino Grandstand. Ito rin ang magiging kalakaran sa Tacloban at sa Palo, Leyte.
Sa tanong ng isang mamamahayag kanina, sinabi ni Col. Padilla na wala silang natatanggap na anumang malubhang banta mula sa mga terorista ayon sa kanilang security assessments. Sa kanilang sinasabing radar screen, wala silang nakikitang anumang panganib.
Nagdeklara ang New People's Army ng tigil-putukan at tuloy ang operasyon ng pamahalaan laban sa Abu Sayyaf, idinagdag pa ni Col. Padilla. Tanging crowd management ang kanilang nakikitang malaking hamon sa pagdating ng Santo Papa.
