UMABOT na sa halos P 1.5 bilyon ang nagamit na pondo ng Catholic Relief Services upang matulungan ang mga biktima ni "Yolanda" noong nakalipas na Nobyembre 2013.
Sa isang panayam, sinabi ni G. Joseph Curry, country representative ng Catholic Relief Services na tumutulong sila sa Lungsod ng Tacloban at mga bayan ng Burauen, Palo at Tanauan sa Leyte at may pitong bayan sa Eastern Samar.
Nakatayo na ang mas matitibay na tahanan at sumisigla na ang mga kapitbahayan. Ang problema ay ang katagalang makabawi ng mga napinslang niyog sa Eastern Visayas na nakaaapekto sa kabuhayan ng mga mamamayan. Iminumungkahi na nila na magtanim na muna ng ibang pananim ang mga magsasaka upang kumita ng maayos.
Sa kanilang pagsusuri, ang kanilang mga natulungan ay nakabalik na sa maayos na kabuhayan subalit hindi ito masasabi sa ibang mga komunidad.
Nakapaglaan na sila ng may 20,000 mga tahanan at may 10,000 tahanan ang nalagyan ng mga palikuran. May 8,000 katao ang nabigyan ng livelihood packages tulad na rin ng mga nasanay sa pagkakakitaan sa larangan ng mga hanapbuhay, pagsasaka at pangingisda.
Magtatagal pa ang kanilang proyekto sa Eastern Samar at Leyte ng dalawa hanggang tatlong taon. Kahit pa umabot na sa 70% ng P1.5 bilyong budget ang kanilang nagamit, ang nalalabing 30% ay nakalaan na para sa mga programa sa susunod na dalawa hanggang tatlong taon.
Wala umanong problema sa mga pamahalaang lokal at ang mga kasamang non-government organizations ay nakikipagtulungan. Ang relasyon sa pamahalaang pambansa ay hinggil sa pamantayan ng relief at recovery programs.
Pinasalamatan niya ang mga obispong kabilang sa US Conference of Catholic Bishops, ang USAID, ang CAFOD, ang Catholic community sa United Kingdom, ang Caritas Australia at iba pa.
Naniniwala si G. Curry na maraming natutuhan sa bagyong "Yolanda" na pinakinabangan na sa pagdaan ng bagyong "Lando" nagkataon lamang na marami pang gagawin ang lahat ng sektor.
Ipinaliwanag ni G. Curry na bagama't handa ang pamahalaang magpakain, mas maganda kung maitatalaga na sa iba't ibang rehiyon ang housing materials upang makapagtayo kaagad ng matitirhan ang mga magiging biktima ng bagyo.
