Ipinahayag kahapon, Sabado, ika-21 ng Disyembre 2019, sa Beijing, ni You Wenze, Tagapagsalita ng Komite sa Suliraning Panlabas ng Pambansang Kongresong Bayan ng Tsina, ang kawalang-kasiyahan at pagtutol sa paglakip ng panig Amerikano sa mga usaping may-kaugnayan sa Taiwan, Hong Kong, at Xinjiang, sa National Defense Authorization Act na nilagdaan noong Biyernes ni Pangulong Donald Trump.
Ipinakikita ani You ng naturang aksyon ang pagwawalang-bahala ng panig Amerikano sa katotohanan, at pagkakaroon ng pagkiling sa Tsina. Ito rin aniya ay pakikialam sa suliraning panloob ng Tsina, at nakakapinsala sa relasyong Sino-Amerikano.
Dagdag ng tagapagsalita, dapat itakwil ng panig Amerikano ang ideya ng "Cold War" at hegemonismo. Hinihimok din aniya ng panig Tsino ang panig Amerikano, na agarang isagawa ang mga mabisang hakbangin para pawiin ang negatibong epektong dulot ng naturang pangyayari, at pangalagaan ang pangkalahatang kalagayan ng relasyong Sino-Amerikano sa pamamagitan ng mga aktuwal na aksyon.
Salin: Liu Kai