Talakayan sa pagitan ng Pilipinas at Vietnam, isinagawa
MATAGUMPAY ang ginawang pag-uusap nina Kalihim Albert F. Del Rosario at ng kanyang Vietnamese counterpart na si Foreign Minister Pham Binh Minh sa Kagawaran ng Ugnayang Panglabas sa Pasay City.
Sa isang panayam kay Kalihim del Rosario, sinabi niyang karaniwang ginagawa ito sa bawat dalawang taon at napag-usapan ang pagtutulungan sa larangan ng politika, kalakalan, turistmo at paglalagak ng kapital. Napag-usapan din ang defense at security cooperation kasama ng mga isyung kinabibilangan ng mga nagaganap sa mga karagatan, pagsasaka, agham at teknolohiya, edukasyon at maging sa enerhiya.
Nagkasundo umano sila sa pagbuo ng paninindigan upang isulong ang Declaration on Conduct of Parties at nakasama rin sa pinag-usapan ang pagtutulungan sa dispute settlement sa karanasang kinakaharap ng dalawang bansa. Isinusulong ng Vietnam ang payapang paglutas sa 'di pagkakaunawaan ayon sa international law at maging sa paraan ng arbitration. Magbabahaginan ng mga impormasyon at magaganap ito sa pagpupulong ng mga kalihim ng tanggulang pambansa na mangyayari sa mga susunod na ilang linggo.
Ayon kay G. del Rosario, darating umano ang Kalihim ng Tanggulang Pambansa ng Vietnam at makakausap ni Kalihim Voltaire Gazmin ng Pilipinas.
Sa katanungan kung susuporta ang Vietnam sa sinimulan ng Pilipinas, sinabi ni G. del Rosario na suportado ng Vietnam ang pagkilos na ito at pinag-uusapan pa kung paano makikipagtulungan sa bawat isa upang malutas ang sigalot.
Ipinaliwanag din ni Kalihim del Rosario ang paninindigan ng Vietnam tulad ng bilateral cooperation tungkol sa mga isyung pang-ekonomiya. Mayroon umanong hotline communication system sa pagitan ng dalawang bansa. Binaggit din niya na nagparamdam ang Tsina tungkol sa panukalang joint development sa mga likas na yamang nasa karagatan at masusing pinag-aaralan pa ng Vietnam ang panukalang ito.
1 2 3 4 5
