|
||||||||
|
||
20130919Melo
|
SA kauna-unahang pagkakataon ay nagbigay ng panayam si Pangulong Benigno Simeon C. Aquino III sa nakalipas na limang araw sa mga mamamahayag sa Zamboanga City.
Mahirap umanong unawain ang ginawa ni MNLF founding Chairman Nur Misuari sapagkat nagtawag siya ng "independence' samantalang nagsasabing tuloy ang peace process. Nagtipon ang mga kasapi at sumugod sa Zamboanga at ang sabi'y peaceful assembly. Sinubukan umano ni Misuari ang pamahalaan sa kanilang ginawang paglalakad ng may armas sa Zamboanga City at tinakot ang mga mamamayang nananahimik. Hindi umano magpapabaya ang pamahalaan.
Ayon kay Pangulong Aquino, sangkot siya sa operasyon bilang commander-in-chief at bilang pangulo sapagkat sa pagtatapos ng lahat ay siya ang mananagot sa taongbayan. Regular umano ang briefing na ibinibigay sa kanya at nakausap na niya ang mga taga-Bangko Sentral ng Pilipinas upang matiyak ang daloy ng salapi. Kinausap na rin niya ang Department of Trade and Industry, Department of Transporation and Communications at Department of Agriculture upang matiyak ang sapat na pagkain hindi lamang para sa Zamboanga City kungdi sa Basilan, Sulu at Tawi-tawi na kilala sa pangalang BASULTA.
Hindi umano micro management ang kanyang ginagawa. May kaukulang assignment ang bawat opisyal ng pamahalaan sa paniniwalang may sapat na kakayahan silang tugunan ang kanilang mga responsibilidad.
Minabuti niyang magtungo sa Zamboanga noong Biyernes upang matiyak na tama ang impormasyong makakarating sa kanya at makapagbigay ng tamang desisyon.
Sinabi pa ni Pangulong Aquino na kung payapang haharap ang MNLF Misuari faction sa pamahalaan ay payapa rin nilang haharapin ang mga ito.
Mayroon sanang nakatakdang pagpupulong sa Indonesia subalit hindi natuloy dahil nagkaroon ng labanan sa Zamboanga City. Idinagdag ni Pangulong Aquino na tumitibay ang ebidensya na sangkot si Miruari sa naganap sa Zamboanga.
Sa katanungan kung anong magagawa upang huwag nang maulit ang pananalakay ng mga MNLF na kaalyado ni Misuari, sinabi ni Pangulong Aquino na pagbubutihin pa ang intelligence service ng pamahalaan. Nabawasan na rin ang puwersa ni Misuari at ipinakita ng pamahalaan ang pagiging seryoso nito sa pagganap sa misyon nitong ipagtanggol ang mga mamamayan.
Bagama't walang bansang magsasabing may kakayahan silang pigilan ang terorismo, dinaragdagan na ng pamahalaan ang mga sundalo't pulis na magbabantay sa bansa.
Kung noong 1986 ay mayroong 250,000 mga kawal at pulis para sa mamamayang 50 milyon, ngayon ay 250,000 pa rin ang nagbabantay sa 95 milyon.
Tanong pa rin ni Pangulong Aquino ay kung paano nakapaghanda ng ganyan ang MNLF nang hindi napapansin? Maaari umanong may naka-alam subalit hindi nagbigay ng impormasyon sa mga kinauukulan.
© China Radio International.CRI. All Rights Reserved. 16A Shijingshan Road, Beijing, China. 100040 |