|
||||||||
|
||
Maraming mga pook nasa ilalim ng Signal No. 3; Glenda, nasa sa Bicol
Maulan sa Maynila. Sapagkat inaasahan ang bagyong "Glenda" sa Maynila bukas, nadarama na ang matinding ulan sa Kamaynilaan. Sa Bicol, sinabi ni Police Director Vic Deona na wala na silang kuryente at libu-libo katao na ang inilikas. May state of calamity declaration sa Tabaco City si Governor Jose Sarte Salceda. (Melo M. Acuna)
ITINAAS na ang Signal No. 3 sa Catanduanes, Albay, Sorsogon, Camarines Sur at Burias at Ticao Islands sa Masbate at maging sa Northern Samar matapos makita ang bagyong "Glenda" may 270 kilometro sa silangan ng Legazpi City at kumikilos ng 20 kilometro bawat oras kaninang ika-apat ng umaga.
Kung hindi magbabago ang takbo at bilis nito, tatama si "Glenda" sa pag-itan ng Albay at Sorsogon pagsapit ng gabi. May lakas si "Glenda" na 120 kilometro bawat oras at pagbugso ng may 150 kilometro bawat oras.
Bukas ng umaga, inaasahang dadaan si "Glenda" sa Metro Manila sa pag-itan ng ika-siyam at ika-labing isa ng umaga. Bukas ng hapon, lalabas ang bagyo sa Luzon sa pagdaan nito sa Zambales.
Nakataas ang Signal No. 2 sa Camarines Norte, Masbate, Marinduque, Quezon at pulo ng Polillo, Batangas, Laguna, Cavite, Rizal, Bulacan, Metro Manila, Samar at Eastern Samar.
Nakataas naman ang Signal No. 1 sa Romblon, Oriental at Occidental Mindoro, Lubang Island, Pampanga, Bataan, Zambales, Tarlac, Nueva Ecija, Pangasinan, Quirino, Nueva Vizcaya, Benguet, La Union, Aurora, Northern Leyte at Biliran Island.
Naglabas na ng babala ang pamahalaan sa mga naninirahan sa mabababang pook at maging sa mga kabundukan na mag-ingat sa posibilidad ng pagbaha at pagguho ng lupa. Pinayuhan na rin ang mga naninirahan sa baybay-dagat na mag-ingat sa pagkakaroon ng daluyong.
May 30 mga international at domestic flights ang kanselado sa sama ng panahon.
Wala ring pasok sa mga paaralan ng Metro Manila at Cavite, sa Albay at iba pang lalawigan sa Bicol.
Deklarado na ang "State of Calamity" sa Tabaco City matapos tamaan ng hanggang baywang na baha dala ng bagyong si "Glenda." Ayon kay Governor Jose Sarte Salceda, deklarado na ang State of Calamity sa Tabaco City.
Samantala, sa Quezon Province, hanggang baywang din ang baha sa Lopez at Calauag.
Ayon kay Bicol Police Director Vic Deona, kasalukuyang binabayo ng malakas na hangin ang Albay pasado alas seis ng gabi. Walang kuryente at libu-libo na ang nagsilikas. Wala pang nababalitang nasasawi, ayon pa sa regional police director.
© China Radio International.CRI. All Rights Reserved. 16A Shijingshan Road, Beijing, China. 100040 |