Lumago ang industriya ng mga sasakyan
TUMAAS ng 21% ang benta ng mga sasakyan ngayong 2015 kung ihahambing sa nakalipas na taon. Sinuri ng Chamber of Automotive Manufacturers of the Philippines ang datos mula Enero hanggang Hunyo ng magkasunod na taon.
Umabot ang kanilang benta ng 131,465 units at mas malaki sa 108,957 noong 2014. Base sa ular ng CAMPI at Truck Manufactureres Association, ang benta noong Hunyo ay 24,185 units dahil sa kaunlarang nakita sa lahat ng sektor at uri ng mga sasakayan. Nagkaroon ng 23% dagdag kung ihahambing sa benta noong Hunyo 2014.
Nagkaroon ng kaunlarang 30% sa mga pampasaherong kotse at bumenta ng 52,778 units na mas mataas sa 40,609 units noong Enero hanggang Hunyo ng 2014.
Ang passenger car category ay nagtamo ng 19% dagdag sa betang 9,840 units noong Hunyo samantalang umabot lamang sa 8,278 kotse ang naipagbili noong Hunyo ng 2014.
Naganap ang magandang benta sa iba't ibang marketing efforts ng mga kumpanya at pagpasok ng mga bagong sasakyan.
Ayon kay Atty. Rommel Gutierrez, kasabay ng pagunlad sa ibang mga industriya ang kaunlarang natamo ng automotive industry. Ang micro SMEs at SMEs ang lumalawak kaya't nangangailangan ng Asian Untility Vehicles at Sports Utility Vehicles kasabay na rin ang light commercial vehicles.
Sa nakalipas na buwan ng Hunyo, natamo ng Toyota Motor Philippines ang 43.9% market share. Pangalawa ang Mitsubishi Motors Philippines na nagtamo ng 19.2% market share samantalang ang Ford Motor Company Philippines ay mayroong 7.9%. Pang-apat ang Isuzu Philippines na may 7.7% at panglima ang Honda Cars Philippines na nagtaglay ng 6.6% market share.
Ayon sa ibang nagsusuri, dahil sa kakulangan ng mass transport system sa Metro Manila, napipilitan ang mga mamamayang bumili ng mga pribadong sasakyan upang makapasok sa paaralan at kanilang mga tanggapan.
1 2 3 4 5 6
