Bagong Pag-asa sa Relasyong Sino-Pilipino, nakikita

Kamakailan ay ginanap sa Embahada ng Pilipinas sa Beijing, ang film showing ng "Bonifacio: Ang Unang Pangulo" at "Heneral Luna," bilang bahagi ng pagdiriwang ng Ika-118 na Anibersaryo ng Kalayaan ng Pilipinas at Ika-41 Anibersaryo ng Pagkakatatag ng Relasyon ng Pilipinas at Tsina.

Ang naturang pagtitipon ay dinaluhan ng ibat-ibang personahe mula sa Lipunang Tsino at diplomatic corps, at isa sa mga ito si Bai Tian, Deputy Director-General ng Department of Asian Affairs ng Ministry of Foreign Affairs (MFA) ng Tsina.

Sa kanyang talumpati, sinabi niyang ang Pilipinas at Tsina ay mayroong libong taong kasaysayan ng pagkakaibigan. At simula nang maitayo ang pormal na relasyon ng Tsina at Pilipinas, nagkaroon ng mainam na pag-uugnayan ang dalawang bansa.

Pero, nitong 6 na taong nakalipas nagkaroon ng mga hadlang sa relasyong Sino-Pilipino dahil sa mga polisiya ni dating pangulong Benigno Aquino III.

"Pero, ngayon, nakikita na natin ang bagong bukang-liwayway," ani Bai.

Nagagalak aniya ang Tsina sa polisiya ni Pangulong Rodrigo Roa Duterte na pabutihin ang relasyon at kooperasyon ng Pilipinas sa Tsina.

Nakahanda aniya ang Tsina, na makipagtulungan sa administrasyon ni Presidente Duterte upang muling pag-ibayuhin ang pagkakaibigan, pagtutulungan at mabuting pakikipamuhayan ng Tsina at Pilipinas.

Sa naturang film showing, nagtalumpati rin si Minister at Consul General Elizabeth T. Te, at sinabi niyang pinahahalagahan ng Pilipinas ang relasyon nito sa Tsina.

Kahit bago pa man aniya maitatag ang pormal na relasyon ng Pilipinas at Tsina, ang dalawang bansa ay matagal nang magkaibigan, at mag-partner sa loob ng daan-daang taon, at nitong nakalipas na 41 taon, nagkaroon ng napalaking pag-unlad sa relasyon ng dalawang bansa.

Aniya pa, ang Embahada ng Pilipinas sa Beijing ay umaasa na makakamtan pa ang napakalaking pag-unlad sa relasyon ng Pilipinas at Tsina at mapapalakas pa ang pagkakaibigan sa pamamagitan ng kooperasyon sa ibat-ibang larangan.

Samantala, pagdating naman sa selebrasyon at dalawang pelikulang Pinoy na kauna-unahang ipinalabas sa Beijing, napili aniya ang dalawang pelikula para ipakita sa mga Pilipino at mga kaibigan mula sa ibat-ibang bansa ang mga napaka-importanteng papel na ginampanan nina Andres Bonifacio at Antonio Luna upang makamit ng Pilipinas ang kalayaan mula sa mga mananakop.

Ang mga ito rin aniya ay upang ipakita sa buong mundo ang ilang importanteng kaganapan sa kasaysayan ng Lahing Pilipino, na humubog sa kultura, pag-iisip at kamalayan ng mga Pilipino.

Makakatulong aniya ang mga pelikulang ito upang mapalakas ang pag-unawa ng Tsina at buong mundo sa kultura at paniniwala ng mga Pilipino.

Si Bai Tian, Deputy Director-General ng Department of Asian Affairs ng Ministry of Foreign Affairs (MFA) ng Tsina

Si Elizabeth T. Te, Minister at Consul General ng Pilipinas sa Tsina