SINABI ni Lingayen-Dagupan Archbishop Socrates B. Villegas na may mga alagad ng batas na lumapit sa kanila at humiling ng ipagkanlong at ipagsanggalang. Nagpahayag ang mga ito na handa silang lumabas sa madla at ihayag ang kanilang papel sa mga pagpaslang na naganap sa nakalipas na ilang buwan.
Sa isang pahayag, sinabi ni Arsobispo Villegas na nababagabag na sila ng kanilang konsensya.
Aalamin umano nila ang katapatan ng mga lumalapit sa kanila at aalamin ang katotohanan sa kanilang mga salaysay. Ayon umano sa alituntunin ng Simbahan at batas, handa silang tanggapin ang mga lalapit sa Simbahan, mabibigyan ng matitirhan at proteksyon hindi lamang sa kanila kungdi sa kanilang pamilya na rin. Obligasyon umano ito ng bawat Katoliko, dagdag pa ng arsobispo.
Kung talagang handang magpahayag ang mga alagad ng batas, titiyakin ng Simbahan na hindi pipilitin ang mga magsasalitang ito. Hindi makikialam ang simbahan sa kanilang personal na desisyong lumantad. Hindi rin sila ibibigay sa Witness Protection Program ng pamahalaan.
Nanawagan si Arsobispo Villegas sa kanyang mga pari sa Lingayen-Dagupan na buksan ang kanilang mga puso, mga kumbento at mga seminaryo at iba pang ligtas ng mga gusali at tiyaking mananatiling ligtas ang mga alagad ng batas na nagnanais humarap sa tamang lugar sa tamang panahon.
Sinabihan din ang mga pari na huwag magsasalaysay ng detalyes ng mga humihingi ng kanlungan. Kailangan ang mga volunteer lawyers at alternative law groups na tumulong upang matiyak na walang sinumang alagad ng simbahan ang makikialam sa mga magiging pahayag.
Ito ang laman ng kanyang pahayag na inilabas ngayong ikalawang araw ng Oktubre.
1 2 3 4 5 
