Kapamilya ng mga nasawing Afghan sa drone strike ng Amerika, galit pa rin

 

Kaugnay ng pagpatay ng tropang Amerikano sa 10 sibilyang Afghan sa drone strike na inilunsad nito sa Kabul, kabisera ng Afghanistan, noong Agosto 29, sinabi ni Romal Ahmadi, kapamilya ng naturang mga nabiktima, na hindi sapat ang paghingi ng paumanhin ng opisyal na Amerikano sa pamamagitan ng telebisyon.

 

 

Dapat aniyang humarap ang mga Amerikano sa lahat ng mga kamag-anakan ng mga nabiktima, at humingi ng paumanhin. Dapat ding panagutin sa batas ang mga nagpaplano at nagsagawa ng naturang drone strike, dagdag niya.

 

 

Winika ito ni Ahmadi sa panayam kahapon, Setyembre 18, 2021, ng correspondent ng China Media Group sa Kabul.

 

 

Pinuna naman ni Mohammad Naseem, isa pang kapamilya, ang kanluraning media sa pagkober sa pangyayaring ito.

 

 

Ayon sa kanya, pagkaraang kunin ang mga larawan ng sasakyan sa labas ng tahanang pinasabog sa drone strike, tinanong ng mga kanluraning mamamahayag na kung talagang walang bomba sa sasakyan, at sinubok din nilang hanapin ang mga bakas ng terorista sa loob ng tahanan.

 

Sinabi ni Naseem, na pagkaraang mabunyag ang katotohanan, dapat aminin ng naturang mga media ang kamalian, at humingi ng paumanhin para sa kanilang ginawa.

 

Editor: Liu Kai
Pulido: Mac Ramos